316 pertsonari laguntza sozialak kendu dizkiete Bilbon

Bilboko Udalak 316 pertsonari Diru-sarrerak Bermatzeko Errenta kendu dizkie, eta laguntza horren zenbatekoa aldatu die beste 67 pertsonari, azken bi urteetan.

Bilboko Udalaren Gizarte Ekintza Saileko Kontroleko eta Ikuskaritzako Negoziatua tresna eraginkorraren bitartez 1.651 kasu ikertu ditu Udalak.

Ikertutako kasuetan, 225 2008koak dira, 942 iazkoak eta 484 aurtengo lehen hilabete bietakoak. Kasuen kopuruak gora egin du zerbitzua sendotu egin delako. Dirusarrerak Bermatzeko Errenta da gehien ikertzen den prestazioa, diru-kopuru handiena daukan laguntza baita.

Kontroleko eta Ikuskaritzako Negoziatuak DBE jasotzen duten 2.200 pertsonen espedienteak ikertu ditu, Bilbon erroldatuta egon baina benetan udalerrian bizi ez diren pertsonak detektatzeko.

Zehazki, Udal Erroldatik 143 pertsona kendu dira eta Bizkaiko Foru Aldundiari eskatu zaio prestazio hori kentzeko. Gainerako esku-hartzeak beste arrazoi batzuekin lotuta daude, adibidez jakien pentsioen inguruko erreklamazioak, udalerri batetik besterako aldaketak, edo Gizarte Premietarako Laguntzak behar ez bezala kobratzea.

Kanpoko salaketak oso bide eraginkorra dira iruzurraren aurka egiteko. Kanpotik egindako % 90 salaketetan baino gehiagotan irregulartasunen bat aurkitzen da dirulaguntzetan, eta gainerakoetan anomaliak detektatzen dira bizikidetzaren egoeran.

Salaketa egiten dutenek gertuko pertsonak dira eta zehatz-mehatz dakite zein den irregulartasuna.

Salaketen arrazoiak hauexek dira, gehienetan direnetatik gutxien izaten direnetara: erroldatuta agertzen diren helbidean ez bizitzea (770 kasu), lan egitea eta Dirusarrerak Bermatzeko Errenta kobratzea (374 kasu), DBE jasotzea eta erroldatu gabeko pertsonekin bizitzea, etxean bizi direnen dirusarrerak ezkutatzeko (294 kasu), eta beste kasu batzuk (213 kasu), adibidez, errentarako laguntzak jasotzea eta errenta ez ordaintzea, laguntzak modu ezegokian erabiltzea (dirulaguntza gastatzea jokoan, droga kontsumoan, dirua jatorrizko herrialdera bidaltzea, etab.).

Salaketa egiteko beste arrazoi bat "patera etxebizitzak" eta gelak baino elkarbizitzako unitate gehiago dauden etxebizitzak dira. Negoziatuan 43 pisuri dagozkien salaketak jaso dira. Pisu horietan 692 pertsona zeuden erroldatuta, eta benetan 134 pertsona bizi ziren.