Ekonomia -
Biltzarra Portugaleten
Raul Arza berriz izendatu dute UGT Euskadiko buru
Botoen % 84,3 eskuratu ditu. Harena hautagaitza bakarra izan da.
AGENTZIAK | ERREDAKZIOA
Raul Arza berriz ere hautatu dute UGT Euskadiko idazkari nagusi, botoen % 84,3 eskuratuta. Sindikatuak bere XII. Biltzarra egin du gaur Portugaleten, eta Arzarena hautagaitza bakarra izan da.
Hain zuzen ere, biltzarrean bozkatu duten 175 ordezkarietako 145ek egin dute Arzaren alde. 27k boto zuria eman dute, eta baliogabeko hiru boto izan dira.
Izendapena lortu eta gero, Arzak adierazi du UGT Euskadi "eredugarria" izan dela, eta Portugaleteko biltzarretik "indartuta" aterako direla. Izan ere, "gutxi hitz egin da guri buruz, eta asko langileen arazoez".
Horren esanetan, sindikatuaren zeregina "salaketak" egitea izan behar a, baina "alternatibak sustatzea" ere bai. Horren ildotik, zerga politika aldatzea eta industriaren sektorearekin "konpromiso irmoa" agertzea proposatu du.
Mercedesen CCOOrekin izandako gatazkaren harira, gertatutakoa "mingarria" izan dela aitortu du Arzak. Nolanahi ere, sindikatuaren estrategia "afiliatuek eta ordezkariek" zehazten dutela gaineratu du.
Besteak beste, Cebek patronaleko ordezkariak, Idoia Mendia PSE-EEko idazkari nagusia eta Iker Casanova EH Bilduko legebiltzarkidea izan dira biltzarrean.
