Lau orduko lanuzteak Eusko Irratian, EiTB erakundean eta EiTBNETen

Lau orduko lanuzteak izan dira ostiral honetan, bi goizean eta beste bi arratsaldean, Eusko Irratian eta EiTBNETen, sindikatuek deituta, 2010ean ezarritako % 5eko soldata murrizketa dela eta.

ELA sindikatuak publikatutako informazioaren arabera, "Eusko Irratiko (Radio Vitoria, Radio Euskadi, Euskadi Irratia), EITB-Erakundeko eta EITB-Net-eko langileek bat egin dute langileen komiteak deituriko bi orduko lanuztearekin".

"Deialdi honek erantzun zabala izan du, besteak beste, EITBneten ia erabatekoa izan da jarraipena eta Euskadi Irratian % 85 ingurukoa", zabaldu du LABek bere partetik.

Euskadi Irratian, Radio Euskadin, Gaztea Irratian eta Radio Vitorian 08:00etatik 10:00etara deitu dute goizeko geldialdia; arratsaldekoa, berriz, 18:00etatik 20:00etara izango da.

EiTBneten, 10:00etatik 12:00etara eta 18:00etatik 20:00etara izan dira lanuzteak.

EiTB erakundeko langile-batzordeak ere deitu du geldialdia; kasu honetan, bakarra izan da, 10:00etatik 12:00etara.

Eusko Irratiko, EiTBNETeko eta EiTB erakundeko sindikatu guztiek deitu dituzte lanuzteak, “% 5eko soldata murrizketa berehala etetea” eta “2010etik kendutako dirua itzultzea” eskatzeko.

Auzitegi Konstituzionalak eta Auzitegi Gorenak baliogabetzat jo zuten % 5eko soldata murrizketa ETBren kasuan, eta ebazpen horrek esandakoa EiTBko gainerako enpresa guztietan ere aplikatzea eskatzen dute sindikatuek.