Volkswagenek 1.466 auto gehiago ekoitziko ditu Landabengo plantan

Volkswagen Nafarroako zuzendaritzak sindikatuei iragarri dienez, Landabengo plantan 1.466 auto gehiago ekoizteko eskaria jaso dute. Hala, 2016an denera 296.086 ibilgailu fabrikatuko dira lantegi horretan.

Urte honetan produkzioa handitzeko Landabenek jasotzen duen bosgarren eskaria da honakoa. Urtea hasi zenean 271.038 auto egitea zuten aurreikusita,  baina jasotako eskari berriei esker, orotara, 25.048 ibilgailu gehiago ekoitziko dituzte.

Aurten, uztailean Landabengo lantegia itxita egon da, berritze lanak direla eta. Besteak beste, Polo auto berria ekoizteko egokitu dituzte azpiegiturak.

Langileek, beraz, opor-egunak uztailean izan dituzte, eta abuztuan lanera itzuli dira. 4.518 behargin ditu Landabengo plantak, eta hiru txandatan banatuta ari dira lanean.