Ekonomia -
Automobil sektorea
Peugeot-Citroën taldeak Opel erosi du 2.200 milioi euro ordainduta
Erosketaren ondorioz, Europako bigarren auto konpainia handiena izango da, Volkswagenen atzetik.
AGENTZIAK | ERREDAKZIOA
Peugeot-Citroën taldeak Opel eta Vauxhall markak eta GM Financialen Europako adarra erosi dizkio General Motors estatubatuarrari 2.200 milioi euroren truke, bi konpainiek ohar bateratu baten bidez jakinarazi dutenez.
Zehatz-mehatz esanda, Peugeot-Citroën taldeak 1.300 milioi euro ordaindu ditu Opel/Vauxhall bereganatzeko eta 900 milioi euro, berriz, GM Financialen Europako adarra erosteko.
Opel eta Vauxhall markek 17.700 milioi euroko fakturazioa izan zuten iaz. Opel eta Vauxhall bereganatuta, Peugeot-Citroën taldea Europako bigarren autogile handiena izango da, Volkswagenen atzetik; Europako merkatuaren % 17 eskuratuko luke.
Azken 16 ekitalditan galerak izan dituzte bai Opelek eta baita Vauxhallek ere; esaterako, 257 milioi dolar (242 milioi euro) galdu zituen 2016an eta 813 milioi, ostera, 2015ean.
