Ekonomia -
Enplegu bulegoa
Artolazabal: Lanbide da Estatuan kontratu gehien egiten dituena
Enplegu eta Gizarte Politika Saileko buruak azaldu duenez, euskal bulegoak lan-merkatuko kontratuen % 3 egiten ditu.
agentziak | erredakzioa
Beatriz Artolazabal Enplegu eta Gizarte Politika sailburuak gaur, asteazkenean, ziurtatu duenez, euskal herritarrak "harro" egon beharko lirateke Lanbiderekin, kontratuen % 3an bitartekaritza lanak egiten baititu eta, horregatik, Estatutako enplegu-zerbitzurik "onenetakoa, edo onena" da.
Ekonomia Berria Forumek antolatutako hitzaldi batean parte hartu du Artolazabalek eta, horren arabera, Lanbide "organizazio handia da", baina "bere ibilbide laburrean zailtasunak" izan dituela onartu du. Diru Sarrerak Bermatzeko Errentaren kudeaketa bere gain hartu behar izan zuen "tresna guztiak izan barik", eta horrek "egoera konplexua eragin zuen". Gainera, garai horretan krisialdi ekonomikoan ginen eta langabezia gora egiten ari zen.
Hala, "egoera konplexu batean sortu zen", hori dela eta, aurreko sailburuen -Aburto eta Toña- lana goraipatu du, "ia blokeatuta" hartu zuten zerbitzua "egonkortzeko" gauza izan baitziren eta "etorkizuneko enplegu-sistemaren" oinarriak ezarri zituzten.
Lanbidek "egoera egonkortu du", % 5eko bitartekaritza tasa izatea lortu ez badu ere, hori baitzen helburua.
Halere, sailburuaren esanetan, tasa horren "ia % 3" lortu du euskal zerbitzuak. Tasa horrek lan merkatuan eskaintzen diren kontratuetatik bulegoak zenbait eskaintzen dituen neurtzen du; "nahikoa ez bada ere, onenetakoa edo onena da", Estatuko gainerako enplegu zerbitzuekin alderatuta.
Bestalde, Artolazabalek Enplegu Prospektiba eta Lan Joeren Behatokia sortuko dutela iragarri du, Future Lan izenekoa, eta Lanbidek kudeatuko du. horrek sektoreka eskainiko ditu enpleguen aurreikuspenak.
