Osakidetzak 2012tik etenda dauden osagarriak ordaindu beharko ditu, 100 bat milioi

EAEko Auzitegi Nagusiak hala erabakita, 2012tik etenda dauden lanbide-garapenaren osagarriak eta horiei dagozkien atzerapenak ordaindu beharko dizkie Osakidetzak langileei. ELA sindikatuak auzitara eraman zuen osagarriok eteteko Patxi Lopezen Gobernuak hartutako erabakia, eta orain arrazoia eman dio Auzitegiak. Sindikatuaren arabera, 100 milioi euro inguru ordaindu beharko du Euskal Osasun Zerbitzuak.

Sindikatu abertzaleak ohar batean azaldu duenez, lanbide-garapenaren osagarriak 2012an kendu zituen Osakidetzak, "aldebakarrez", eta geroztik ez ditu berreskuratu "epaitegi batek behin-behinekoz horretara behartu" zuen arren. Langileek osagarri horiek eta dagozkien atzerapenak jasotzeko eskubidea dutela berretsi du azken epai horrek.

Osakidetzako lanbide-garapenaren ereduaren "guztiz aurka" dago ELA, eta eredua berraztertzeko eta negoziatzeko eskatu zion Osasun arduradunei. "Osakidetzaren negoziazio-borondaterik ezaren aurrean, ez genuen beste aukerarik izan auzitara jo eta epaia irabaztea baino", erantsi du sindikatuak oharrean.

ELAren aburuz, krisia hasi zenetik langileei ezarritako "murrizketetako" bat da hauxe. "Hemen politika zorrotzagoak aplikatu dituzte, Madrilen aplikatzen zituztenak baino. Eroste-ahalmenean % 21eko galera metatu dute langileek", salatu du.

Epaia kontuan hartuta, erabaki hori hartu zuten arduradun politikoen dimisioa eskatu du ELAk.

Osakidetzak kasazio helegitea aurkez dezake.

Osakidetzako iturriek Efe albiste agentziari jakinarazi diotenez, epaia "errespetatzen" dute, baina "balizko helegiteak aurkezteko" zerbitzu juridikoek epaia aztertzen ari direla esan dute.