Bertan behera gelditu da Gipuzkoako sorosleen greba hitzarmena onartu ostean

Gipuzkoako hondartzetako sorosleek bertan behera utzi dute greba, asteazken honetan, Gurutze Gorriarekin batera adostutako hitzarmenaren proposamena onartu ostean.

Talde honen ordezkariek azaldu dutenez, astearte eta asteazken honetan egin dituzten bileretan, Gurutze Gorriak proposatutako eta udalek bermatutako akordioaren alde agertu dela gehiengoa.

Zehatz-mehatz, hitzarmenari men eginez, aurreneko urtean sorosle bakoitzak 200 euro gehiago kobratuko ditu, eta bigarrenetik aurrera, 400 euro gehiago. Hortaz, %13 eta %33-ko igoera adostu dute.

Gainera, laugarren denboralditik aurrera antzinatasuna kontuan hartuko da, eta 118 euroko plusa izango du sorosle bakoitzak, eta %15eko igoera izango du igande eta jai egunetan lan egiteagatik.

Bukatzeko, 2018tik aurrera, Gurutze Gorriak finko eten gisa bilakatuko ditu kontratu guztiak.