Caixabankek 173 langile kaleratu eta 37 bulego itxi nahi ditu Hego Euskal Herrian

Caixabank finantza taldeko zuzendaritzak langileak kaleratu eta bulegoak itxi nahi dituela jakinarazi die ostegun honetan sindikatuei, Caixabankeko eta sindikatuetako iturriek baieztatu dutenez. Sindikatuek aurreratu dutenez, ez dute kaleratzerik onartuko, aitzitik, borondatezko irteerak soilik onartuko dituzte.

Euskal Autonomia Erkidegoan (EAE), 67 langile kaleratu eta 32 bulego itxi nahi ditu. Araban, 12 langile kaleratu eta 6 bulego itxi nahi ditu; Gipuzkoan, 14 eta 7 bulego; Bizkaian, 41 langile eta 19 bulego. Nafarroan, ostera, murrizketa handiagoa izango da: 106 lanpostu eta 5 bulego.

Zuzendaritzak lan-erregulazioko espedientea proposatu die sindikatuei. Estatu osoan 2.157 langileri eragingo lieke, lantalde osoaren % 7,3ari. Halaber, bulegoen % 18 ixteko asmoa du.

Caixabankeko iturriek azaldu dutenez, taldearen asmoa hiruzpalau langile dituzten bulego txikiak itxi eta 15-20 langileko bulego handiak zabaltzea da. "Ez dugu herrietako bulego bakar bat ere itxiko, errentagarria ez izan arren. 10.000 biztanletik beherako udalerrietako bulegoak ere ez ditugu itxiko", azpimarratu dute. EAEn, esaterako, Barakaldon, Bilbon, Donostian edota Gasteizen itxiko dituzte bulegoak.

Sindikatuek, ostera, gehiegizko murrizketa dela salatu dute. Ricard Ruiz CCOO sindikatuak Caixabanken duen ordezkariaren hitzetan, % 100ean borondatezko irteerak direnak bakarrik onartuko dituzte.