Ekonomia -
Turismoa
Euskadik LGTBI gunea izango du lehen aldiz FITUR azokan
Abenduko datuen faltan, iaz 3,5 milioi bisitari inguru izan ziren Araban, Bizkaian eta Gipuzkoan.
AGENTZIAK | ERREDAKZIOA
Euskal Autonomia Erkidegoak lehen aldiz LGTBI gunea izango du FITUR turismoaren nazioarteko azokan, Alfredo Retortillo Turismo, Merkataritza eta Kontsumo sailburuak eta Harkaitz Millan Basquetour agentzia publikoko promozio zuzendariak jakinarazi dutenez.
Milanek azaldu duenez, "helburua kolektibo horrentzat egokitutako planak eskaintzea da, baina ez zerbait ezberdina edo bereizia aurkeztea, eskaintzak sexu orientazioaren arabera egiteak ghettoak sortzea dakarrelako". Eusko Jaurlaritzak Gehitu elkartearekin elkarlanean jarriko du gune hori martxan asteon Madrilen egingo den azokan.
Bestalde, Retortillok 2018ko balantzea egin du eta, abenduko datuen faltan, turismo datuak "oso onak" direla esan du. Behin-behineko datu horien arabera, Araban, Bizkaian eta Gipuzkoan 3,5 milioi bisitari inguru izan ziren iaz; hortaz, litekeena da 2017ko datuak hobetzea.
Retortillok erantsi du atzerritik datozen bisitarien kopurua hazi egin dela eta hori dela turismoak izan duen gorakadaren arrazoietako bat.
