Ekonomia -

GREBA

Bizkaiko metalgintzako lehen greba 'arrakastatsua' izan dela esan dute sindikatuek

ELA, LAB, CCOO eta UGT sindikatuen arabera, lanuztearen jarraipena % 70-80koa izan da. Halaber, greba historikotzat jo dute, "Bizkaiko metalgintzako langileak iraganean bezala mobilizatu direlako".

Bizkaiko metalgintzako langileen manifestazioa Bilbon, ELA, LAB, CCOO eta UGTk deituta. EFE
Bizkaiko metalgintzako langileen manifestazioa Bilbon, ELA, LAB, CCOO eta UGTk deituta
Greba egin dute Bizkaiko metalgintza sektorean

1:25

EITB.EUS

Whatsapp Facebook Twitter Telegram Email

Bizkaian, metalgintza sektoreko 50.000 langile greba egitera deituta daude gaur. ELA, LAB, CCOO eta UGT sindikatuek bost greba egun deitu dituzte, sektoreko lan hitzarmen berri baten alde. Gaurkoa, lehendabiziko lanuztea izango da, eta gainerako laurak ekainean izango dira: hilaren 6an, 7an, 20an eta 21ean.

Sindikatuek esan dute grebaren jarraipena % 70-80koa izan dela eta, ondorioz, lanuztea "arrakastatsua" izan dela. Halaber, FVEM patronala gogor kritikatu dute, "sindikatuen arteko plataforma bateratuak egindako aldarrikapenak kontuan hartu gabe, langileak mespretxatzen ari delako".

Goizean, manifestazio jendetsua egin dute Bilboko kaleetan barrena, 'Hitzarmen duin baten alde, Bizkaiko Metala greban' goiburupean.

Martxa Jesusen Bihotza plazatik abiatu da, 11:30ean, eta Euskadi plazan amaitu da, Bizkaiko metalaren patronalaren egoitzaren aurrean. Manifestazioan 10.000 langile inguruk hartu dute parte.

Mikel Etxeberria sektorean gehiengoa duen ELA sindikatuko bozeramaileak adierazi duenez, "jarraipena handia izaten ari da, baina lehen balorazio gisa, esan beharra dago langileen erantzuna handia izan dela Bizkaian tamaina eta ezaugarri askotariko enpresak daudela kontuan izanda".

"Sektorean erreferente diren enpresa asko gelditu dira, baita lantegi txiki asko ere", adierazi du. Eta izen batzuk ere aipatu ditu: Petronorreko azpikontratak, Ormazabal eta Arteche taldeak eta Estampaciones Bizkaia fabrika.

Etxeberriak gogora ekarri du azken urte eta erdian patronalak negoziazioari uko egin diola eta ez duela "inolako ekarpenik egin". Hori dela eta, hurrengo bilerara –ekainaren 3an- lan baldintza "duinak" bermatuko dituen eta "langileei esker izandako irabaziak hobeto banatzeko" edukiak eraman ditzala eskatu dio.

"Konponbidea nahi badute, greba gehiagorik ez izatea nahi badute, lau sindikatuok modu bateratuan helarazi genion dokumentuak biltzen dituen hamar puntuei erantzun behar diote", erantsi du.

Iker Gonzalo CCOO sindikatu ordezkariak nabarmendu du Bizkaiko Metalgintzakoa dela Euskal Autonomia Erkidegoan dagoen hitzarmenik "indartsuena". "2012an horretaz harro egoteko moduan ginen, baina egun, lan baldintzek okerrera egin dute, eta Araba, Burgos edo Kantabriako hitzarmenekin alderatuz gero, oso atzean geratu gara", ohartarazi du.

Horrez gain, hitzarmena azkenekoz berritu zenetik zortzi urte igaro direla salatu du: "Langileak nazkatuta, baina indartsu daude, gaurko grebak erakutsi duenez; patronalak atzera egingo duela eta benetako lan hitzarmen duin bat negoziatzeari ekingo diola espero dugu".

Eulate Zilonizaurrekoetxea LAB sindikatuko ordezkariak ere beharginek gaur egin duten indar erakustaldia azpimarratu du. "Asko daukagu irabazteko; gaurkoa egun historikoa izan da, baina hau guztia hitzarmen berriaren sinadurarekin amaituko da, eta hori ere historikoa izango da", adierazi du.

Jose Maria Rojo UGT sindikatuko ordezkariak ere antzeko adierazpenak egin ditu: "Bizkaian egun historikoa da gaurkoa, beste garai batzuetan bezala mobilizatu gara Metalgintzako langileak, eta hori harro egoteko modua da".

Sindikatuen esanetan, gutxienez 250 enpresa baino gehiagoko beharginek egin dute bat deialdiarekin. Azken unean, aste honetan, CNT sindikatuak ere bat egin du borrokarekin eta mobilizazioekin, nahiz eta deitzaileen artean ez izan.

Negoziazioa, blokeatuta

Hitzarmen berriaren negoziazioa ez aurrera ez atzera dagoela salatu dute sindikatuek. Greba deialdia eginagatik, ordea, patronalarekin bilerak egiteko asmoa agertu dute hitzarmena negoziatzen jarraitzeko. 2011koa da Bizkaiko metalgintza sektoreko azken ituna.

Aldarrikapenen artean, 2018ko urtarrilaren 1etik aurrera atzerapenak jasotzea eta soldata igotzea eskatzen dute.

Patronalak, bere aldetik, gezurtatu egin du sindikatuek esandakoa.

Gaurko greba egunaren ostean, ekainaren 3an egingo dute lan hitzarmena berritzeko hurrengo bilera. Aurrerapausorik ezean, beste lau greba egun egingo dituzte ekainean: hilaren 6an, 7an, 20an eta 21ean.

Hau zure interesekoa bada, baliteke beste gai hauek ere izatea
Zer gertatu da Bizkaian? Eusko Langileen Alkartasuna albisteak LAB Grebak gaur Euskal Autonomia Erkidegoa Lana albisteak Ekonomia berriak Eguneko albisteak Eguneko albisteak Sindikatuak Espainian CCOO albisteak UGT albisteak Lan gatazkak azken ordukoa Metalgintza albisteak