Ekonomia -
hiri-adierazleak
Getxo da EAEko udalerri aberatsena
Guztira, 12 euskal udalerri daude Espainiako 50 aberatsenen artean; esaterako, Donostia, Gasteiz, Arrasate edo Zarautz.
agentziak | erredakzioa
Hamabi euskal udalerri daude Espainiako 50 aberatsenen artean, eta Getxo da EAEko aberatsenen artean lehena. Atzetik, Donostia eta Gasteiz daude, Estatistika Institutu Nazionalaren datuen arabera.
20.000 biztanle baino gehiagoko 405 udalerri aztertu dituzte Espainian, EBko hiri nagusien bizi-baldintzen inguruko informazioa bereganatzeko proiektu baten harira.
Espainiako per capita errenta handiena Pozuelo de Alarconek (25.957 euro) dauka; atzetik, Boadilla del Monte (19.702 euro) eta Madrilgo Las Rozas (19.340) daude.
Getxo, berriz, Espainiako seigarrena eta EAEko lehena da, 18.599 eurorekin, 2016ko datuen arabera. Atzetik, Donostia eta Gasteiz daude, 10. eta 11. postuetan, 17.203 eta 16.848 eurorekin, hain zuzen.
Arrasate (Gipuzkoa) 13. postuan dago, 16.385 eurorekin; eta 18.ean, Zarautz (15.456); 23an, Durango (15.145), eta 24.ean, Eibar (15.101).
Bilbo (14.870 euro) 25. postuan dago, eta, atzetik, Leioa (14.575) eta Galdakao (14.532) ditu.
Hernani, berriz, 39.ean dago, 13.451 eurorekin, eta Portugalete, 46.ean, 13.216 eurorekin.