Ekonomia -
Araba
Akordio batek 70 eguneko grebari amaiera eman dio Aguraingo DHL konpainian
Enpresa hitzarmen berri bat eta KPIren gainetik soldata igoerak adostu dituzte, baita aldi baterako 11 langileren kontratuak mugagabe bihurtzea ere. Hitzarmen berria 2021era arte egongo da indarrean.
Agentziak | Erredakzioa
DHLren zuzendaritzak eta beharginek akordioa lortu dute astearte honetan. Honenbestez, Aguraingo (Araba) lantegian egiten ari ziren greba bertan behera geratu da. Guztira, 70 egun greban eman dituzte langileek. Lantegiko 110 beharginek hitzarmen berri bat eskatzen zuten, eta hori langile guztiei aplikatzea.
ELAk jakitera eman duenez, enpresa hitzarmen berri bat eta KPIren gainetik soldata igoerak adostu dituzte, baita aldi baterako 11 langileren kontratuak mugagabe bihurtzea ere. Hitzarmen berria 2021era arte egongo da indarrean.
Era berean, zortzi langileren kategoria hobetuko da. Urtean 3.500 euroko soldata igoera suposatuko du horientzako. Merkantzia garraioko Arabako lurralde hitzarmena aplikaziorako erreferentzia izatea adostu dute, biltegi handiena baztertuz.
Gainera, behin-behinekotasuna mugatuko dute, aldi baterako langileak mugagabeak automatikoki bihurtzeko formulak adostu dituztelako.
"Borroka duinagatik" langileak zoriondu ditu ELAk, soldata igoerak bakarrik ez, "kolektibo ahulenen eta prekarioenen baldintzak hobetzea lortu dutelako baizik".
