Itxi

Ekonomia

Koronabirusa

ELAk neurriak eskatu ditu Mercabilbaon, "foku kontrolaezina" bihur ez dadin

Agentziak | erredakzioa

Sindikatuak adierazi duenez, COVID-19aren ondorioz jarduera bertan behera utzi beharko balitz, "frutak, barazkiak eta arrainak hornitzeko arazo larri bati aurre egin beharko genioke".

  • Mercabilbao, Basauri.

    Mercabilbao, Basauri. Argazkia: Imanol Aragon

ELAk Mercabilbaoko salmenta baldintzak salatu ditu, eta premiazko neurriak eskatu ditu elikagai galkorren banaketa-zentro hori "koronabirusaren foku kontrolaezina" bihur ez dadin. "COVID-19ak presentzia izango balu, eta jarduera etetea erabaki beharko balu, frutak, barazkiak eta arrainak hornitzeko arazo larri bati aurre egin beharko genioke", esan dute sindikatuko arduradunek.

ELAk ohar baten bidez jakinarazi duenez, astebete baino gehiago darama Mercabilbaon fruta, barazki eta arrainaren salmenta zein baldintzatan egiten den salatzen agintarien aurrean. Ohartarazi duenez, "egoera kritikoa da langileentzat, baina baita biztanleria orokorrarentzat ere".

Sindikatuak gogorarazi duenez, Mercabilbaok, Bilboko Udalak % 60ko partaidetza duen sozietateak, fruta, barazki eta arrain sektoreko 70 bat enpresa handizkari biltzen ditu, eta "Estatuko iparralde osoko txikizkariak bertaratzen dira egunero"; horrek esan nahi du "etxeetara iristen den fruta, barazki eta arrainaren zati handi bat Mercabilbaotik igaro dela".

Mercabilbao Basaurin dago, "epidemiak gehien erasandako udalerrietako bat da, eta EAEn kutsatze gehien eragin ditu", azaldu du ELAk, eta, osasun-alerta egoera deklaratu ostean, agintariekin harremanetan jarri zela azaldu du. Sindikatua kezkatuta zegoen, "salmenta hori egiteko babes-neurririk ez zegoelako, edukiera-mugarik gabe, eskudirutan ordaintzeko debekurik gabe eta langileentzako babesik gabe".

ELAk adierazi duenez, "zentzugabekeria" horren aurrean, eta "jakitun izanik Mercabilbao koronabirusa penintsulako iparraldeko eremu osora irradiatzeko foku potentziala izan daitekeela", behin eta berriz saiatu da Bilboko Udalarekin, Segurtasun Sailarekin eta Lan Sailarekin harremanetan jartzen, "zerbitzuak behar bezala funtziona dezan bermatzeko beharrezkoak diren segurtasun-neurriak premiaz ezartzeko".

Zentzu horretan, martxoaren 15ean agintariek Mercabilbao edukiera mugatzera behartu zutela gogorarazi du, baina "hori da gaur egun ezarri den neurri bakarra"; izan ere, Ertzaintzak "ibilgailuek barrutirako sarbideak zaintzen ditu, baina ez ditu pabiloiak kontrolatzen herritarrei ezarritako gutxieneko baldintzak betetzen direla bermatzeko". Eskularrurik eta maskararik gabe, edo etxetik dakartzatenak, barruan egoteko gehienezko denbora errespetatzen ez duten bezeroen masifikazioa, eta metro eta erdiko segurtasun distantzia bermatzen ez dela salatu du ELAk.

Sindikatuak adierazi duenez, egoera "jasanezina" da, eta langileek "egunero egiten diete aurre infekzioaren eraginpean dauden arrisku egoerei".

"Oraindik badu konponbidea. Oraindik ez da gertatu. Egoera horren aurrean egon aurretik jarduteko eskatzen diegu agintariei. Bilboko Udala da Mercabilbaon gertatzen den guztiaren erantzule zuzena. Alarma-egoera honetan dagokion erantzukizunaren arabera jokatzeko eskatzen diogu", gaineratu du.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Batzordearen telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.
  • Bisitatuena

      Kargatzen ikusiena
      Kargatzen ikusiena