Angela Merkelek zergatik ez ditu nahi eurobonoak?

Ekonomilari askok aspaldi ohartarazi zutena argi gelditzen ari da: Euroak ez duela funtzionatuko, moneta bakarra duten herrialdeek politika ekonomikoak koordinatzen ez badituzte.

Euroa erabiltzen duten 17 herrialdeek, batez ere, zerga politikak koordinatu beharko lituzkete. Azken batean, zentzuzkoena litzateke, zor publikoa bateratua izatea: alegia, euroko 17 herrialdeek merkatuetan finantziazioa Eurobonoen bitartez lortzea, herrialde guztiek bere gain hartuko luketen zor publikoaren bitartez.

Baina, jakina, horrek mesede egingo lieke finantza sinesgarritasun eskasa duten herrialdeei, Alemaniako babesari etekina aterako liokete. Alemaniarentzat, ordea, txarra izango litzateke, merkatuek pentsatuko balute Alemaniak sinesgarritasuna galduko lukeela herrialde pobreagoak sustengatu behar dituelako.

Hori dela eta, Alemaniako kantzilerrak, Angela Merkelek ez die argi berdea eman nahi Eurobonoei. Frantziako presidenteak, Nicolas Sarkozyk, arratsaldeko bileran Merkel konbentzitu nahi du, baina, ez da lan erraza izango. Merkelek alemaniar boto-emaleak behar ditu karguan jarraitzeko eta ez, frantziarrak, espainiarrak edota italiarrak.