ELAk bertan behera utzi ditu Lidl supermerkatuetan deitutako geldialdiak

ELA sindikatuak bertan behera utzi ditu ostiralerako eta larunbaterako Lidl supermerkatuan deitutako geldialdiak enpresarekin akordio batera iritsi ostean. Akordioaren arabera, enpresak segurtasuna handitzeko, langile gehiago kontratatzeko eta urte osoan egindako ordu osagarrien % 30 ordaintzeko konpromisoa hartu du.

Sindikatuak ohar baten bidez aditzera eman duenez, "ELAk Lidl supermerkatuetan hasitako gatazka akordio batekin amaitu da, apirilaren 30ean geldialdiak egin eta maiatzaren 22rako eta 23rako geldialdi gehiago deitu ostean".

ELAren iritziz, akordioak “osasun alerta garaian langileek egindako lan ikaragarria aintzat hartzen du”, eta lorpen hori “are handiagoa da” kontuan izanda “emakumezkoak gehiengoa diren prekarizatutako sektorea dela” jakinda eta “lanaldi gehienak murriztuak direla”.

ELAko ordezkariak gogora ekarri dute mobilizazioak langileek hasi zituztela “enpresa koronabirusak eragindako osasun alertan egiten ari zen kudeaketarekin gustura ez zeudelako”.

Akordioa

Langileek “segurtasun handiagoa, laneko gainkarga aurrera ateratzeko kontratazio gehiago egitea, azken hilabeteetan egondako ahalegin berezia eta aparteko orduak ordaintzea” eskatzen zuten “eta zuzendaritzak eskaerak onartu ditu”. Halaber, urteko ordu osagarrien % 30 kontuan izatea lortu dute.

ELArentzat, akordioa “garrantzitsua da, ez Lidleko langileentzat bakarrik, elikagaietako sektoreko langile guztientzat baizik, adierazpen publikoetatik eta limosnetatik haratago doan aintzatestea merezi dutelako”. Elikagaien sektoreko enpresek, ELAk salatutakoaren arabera, “krisi honetan langileen konpromisoaz eta ahalegin bereziaz baliatzen dira, eta etekin horiek eragina izan behar dute etekina sortzen dutenengan”.