Itxi

2020/05/26

17:10

Ekonomia

Bidesaria

Auzitegi Nagusiak kamioientzako bidesariak baliogabetu ditu berriro Gipuzkoan

Agentziak | Erredakzioa

Hala ere, Gipuzkoako Aldundiak iragarri du N-I eta A-15 errepideetan dauden kamioientzako bidesariak kobratzen jarraituko duela eta Auzitegi Nagusiaren epaiaren aurkako helegitea aurkeztuko duela.

1:46
Auzitegi Nagusiak bigarren foru araua baliogabetu du. EiTB.
  • Whatsapp
  • Whatsapp
  • Telegram
  • Bidali

Euskal Autonomia Erkidegoko Justizia Auzitegi Nagusiak bigarren aldiz baliogabetu ditu Gipuzkoako Aldundiak N-I eta A-15 errepideetan kamioiei ezarritako bidesariak, Espainiako Garraiolarien Elkarteen Federazioak (Fenadismer) jakitera eman duenez.

Fenadismerrek ohar batean zehaztu duenez, EAEko Justizia Auzitegi Nagusiak erabaki hori hartu du lehen auzialdian (2018ko apirilean) jasotako argudio berberak "errepikatzen" dituen epai batean, uste baitu Gipuzkoan ezarritako bidesarien erregimenak "zeharkako diskriminazioa" eragiten duela barneko trafikoari dagokionez, eta Europak ezarritako "diskriminaziorik ezaren printzipioa urratzen" duela.

Orain baliogabetutako araudiak aldaketa batzuk egin zituen hasierako diseinu orokorrean, EAEko Justizia Auzitegi Nagusiak lehen araua bertan behera uztea eragin zuen interpretazioari aurre egiteko. Arau horren gainean helegite bat aurkeztuta dago Auzitegi Gorenean, eta organo horren erabakiaren zain dago oraindik.

Auzitegi Gorenak gaiaren inguruko erabakia hartzeko zain, EAEko Auzitegi Nagusiak bigarren foru araua baliogabetu du, lehenengoaren bertsio "makillatua" dela iritzita, Fenadismerrek azaldu duenez.

Garraiolarien federazio horrek gogorarazi duenez, nahiz eta lehen araua baliogabetu, Gipuzkoak bigarren arau bat egin zuen, eta Aldundiak bi urte horietan bidesaria kobratzeko eskatzen jarraitu zuen, "egunero bi bideetatik ibiltzen diren 10.000 kamioi baino gehiagori"; izan ere, bestalde, lehen epaia oraindik ez zen irmoa.

Fenadismerren ustez, erabakia "ausarkeria" izan da, "bildutako guztia garraiolariei itzultzeak ekar ditzakeen ondorio ekonomikoengatik".

Oharrean, federazio horrek Auzitegi Nagusiaren epai berria aintzat hartu du, garraiolarien elkarteek aurkeztutako "argudio nagusiak" kontuan hartzen dituelako, eta espero du Gipuzkoako Aldundiak "oraingo honetan bidesariaren ordainketa geldiaraztea, Auzitegi Gorenak auzia "ebatzi arte".

Ildo horretan, "kaltetutako" garraiolariei eskatu diete "ordaindutako bidesarien fakturak eta ezar dakizkiekeen zigorrak gorde ditzatela", ebazpena "irmoa" izan arte, eta, ondorioz, "bildutako zenbateko guztia gehi dagozkion legezko berandutze-interesak berreskuratzeko aukera ireki arte".

Fenadismerrek iragarri du, halaber, "Europako homologoei epai judizialaren ondorioen berri emango diela, bazkideei bidesari eta isun guztiak biltzea komeni dela jakinarazteko, ondoren, erreklamazioa egin ahal izateko".

Gainera, gogorarazi duenez, gai honen hasieratik Gipuzkoako bidesarien "gaitzespena" adierazi zuen, "errepide bidezko garraioaren sektoreak sobera laguntzen baitu" lurraldeko diru-kutxa publikoetan, "hidrokarburoen zerga bidez".

Bestalde, Espainiako Merkantzien Garraioen Konfederazioak "ospatu" egin du EAEko Justizia Auzitegi Nagusiaren epai berria, eta, haren ustez, "agerian utzi du bidegabekeria izugarria egiten zela Gipuzkoatik kanpo zetorren salgaien garraioaren zati bati baino ez zitzaiolako bidesari hori kobratzen".

"Tamalez, Gipuzkoako Foru Aldundiak A-15 eta N-I errepideetako bidesarien ordainketari eustearen beldur gara, aurreko antzeko epaiekin egin duen bezala", gaineratu du CETMk, eta, horretarako, "diru-bilketarako ahalegin justifikaezin eta onartezin bati erantzun dio", eta horrek "gipuzkoar guztien interesekin talka egingo du".

Kamioiei bidesariak kobratzen jarraituko du Gipuzko Aldundiak, eta helegitea aurkeztuko dio epaiari

Gipuzkoako Foru Aldundiak astearte honetan iragarri duenez, N-I eta A-15 errepideetan dauden kamioientzako bidesariak kobratzen jarraituko du, eta Euskal Autonomia Erkidegoko Justizia Auzitegi Nagusiaren epaiaren aurkako helegitea aurkeztuko du.

Aintzane Oiarbide Bide Azpiegituretako foru diputatuak adierazpen horiek egin ditu ohar batean, EAEko Auzitegi Gorenaren epaiaren berri izan ostean; izan ere, bigarren foru araua baliogabetu diote, eta hasierako arauari aldaketa batzuk egin dizkion arren, EAEko Auzitegi Nagusiak ere atzera bota du, Auzitegi Gorenean helegitea jarrita egon arren.

Oiarbidek azaldu duenez, gaur ezagututako epaia "ez da irmoa eta ez du kautelazko neurririk proposatzen", eta, beraz, Aldundiak Gipuzkoako Parlamentuaren bermearekin "orain dela bi urte egin zuen kobrantza-politikari eusten jarraituko du, ibilgailu astunei ordaintzera behartuz, Gipuzkoako errepide-sarearen zati horren mantentze-lanak finantzatzeko".

Diputatuak iragarri du, halaber, foru erakundeak kasazio helegitea aurkeztuko duela Auzitegi Gorenean, epaian aurreikusitako 30 eguneko epean.

Foru arduraduna oso kritiko agertu da epaiaren zentzuarekin, eta azpimarratu du aipatutako 6/2018 Foru Araua "zehatz-mehatz idatzia" izan zela, "Europa barneko ardatzetan erabiltzeagatiko ordainketa agintzen duen Europako zuzentarauari jarraituz eta Europako Batzordeak beharrezko abalak eman ondoren".

Modu berean, gogoratu du, "foru arauaren proiektua Europako instantzietara bidali zela, Batzar Nagusietan onartu aurretik, eta erkidegoko arduradunen babesa izan zuen".

  • Bisitatuena

      Kargatzen ikusiena
      Kargatzen ikusiena
    ;