Ekonomia -
Koronabirusa
Urkullu erabat "haserre", EAE kanpoan uzten duen diru banaketa dela eta
Nafarroako Gobernuak defendatzen du Hitzarmen Ekonomikoaren esparruan negoziatu behar dutela Foru Erkidegoak eta Estatuak Nafarroari zein zati dagokion 16.000 milioi euroko funtsetik.
agentziak | erredakzioa
Iñigo Urkullu lehendakaria erabat "haserre " agertu da COVID-19aren krisiari aurre egiteko funtsaren banaketagatik, horrek EAE 5.000 milioiko tartetik kanpo utziko lukeelako, foru erregimenagatik. Hori dela eta, Kontzertu Ekonomikoaren batzorde mistoaren premiazko bilera eskatu du, eta Pedro Sanchez presidenteari esan dio konfiantza "ekintzekin" frogatzen dela.
Espainiako Gobernuak astearte honetan ziurtatu zuenez, Euskal Autonomia Erkidegoa eta Nafarroa egoera berean egongo lirateke.
Onda Cero irratiari eskainitako elkarrizketa batean, Urkulluri galdetu diote ea zenbateraino dagoen haserre COVID-19aren funtsaren gaiarekin, 1etik 10erako ranking batean, eta erantzun d maximoan egongo litzatekeela, 10ean.
Eusko Jaurlaritzak "erabateko desadostasuna" agertu zuen atzo Espainiako Gobernuak onartutako 16.000 milioiko funtsaren banaketa irizpideekin, "aldebakarreko planteamendua" egin duelako eta Euskadi laugarren tartetik "arbitrarioki" baztertu duelako, Urkulluren arabera. Hori dela eta, Kontzertuaren Batzorde Mistoa premiaz egitea eskatu zuen, banaketa aldebikotasunez adosteko eta Kupoa zehazteko Metodologia Legearen "urraketa nabarmena" bideratzeko.
Sanchezez COVID-19ko krisiaren aurretik baino gehiago edo gutxiago fio den galdetuta, esan du ez dela "gehiago edo gutxiago" fio, beti esan duela, harreman instituzional horietan, akordiorako borondatea egon behar duela.
Nafarroako Gobernuak Estatuko Hitzarmenaren esparruan negoziatzea defendatu du
Nafarroako Gobernuak defendatzen du Hitzarmen Ekonomikoaren esparruan negoziatu behar dutela Foru Erkidegoak eta Estatuak Nafarroari zein zati dagokion 16.000 milioi euroko funts itzulezinetik eta zer formularekin.
Diru gehiena Hezkuntzan edo Osasunean eragindako ezohiko gastuak finantzatzeko da, baina 5.000 milioi ere badaude diru-sarrera fiskalen galera konpentsatzeko.
Nafarroaren kasuan, "ez du zertan konpentsatu autonomia fiskala dugulako", esan du Elma Saiz Ekonomia eta Ogasun kontseilariak prentsaurrekoan.
Hori dela eta, hitzarmenaren jarraipen-batzordeari igorri zaio, "defizitaren helburuetara malgutasun handiagoz iristeko tresnak" bilatzeko foro gisa.
"Pandemia honetan erkidegoen esku dirua jartzen duen edozein formula positiboa da", gaineratu du, eta, beraz, Estatuarekiko negoziazioaren amaieran emaitza "baloratzeko aukera izango dugu".
