Ekonomia -
Nazioarteko Diru Funtsa
Munduko ekonomiaren aurreikuspenak txikitu ditu NDFk
Langabezia-tasak behera egingo du mundu guztian, baina eurogunean % 10ean mantenduko da. Bestalde, langabezia-tasa % 20,1etik % 20,7ra igoko da Espainian.
Redacción
Munduko ekonomiaren aurreikuspenak txikitu ditu berriro Nazioarteko Diru Funtsak (NDF). Horrela, aurten % 4ko hazkundea izango du, eta ez % 4,2koa, 'Munduko ekonomiaren aurreikuspenak' txostenaren zirriborroaren arabera. Ansa Italiako albiste-agentziak eman du zirriborroaren berri.
Zirriborroaren arabera, munduko Barne Produktu Gordinak (BPG) % 4 egingo du gora aurten, eta % 4,2 2012an. Hazkundea % 4,2koa eta % 4,3koa izango zela adierazi zuen NDFk bere aurreikuspenetan lehenago.
Euroguneko ekonomia % 1,7 haziko da 2011n eta % 1,3 2012an, zirriborroaren esanetan. Aurreko aurreikuspenen arabera, ostera, hazkundea % 1,9koa eta % 1,4koa izango zen hurrenez hurren.
Aurreikuspenek ere okerrera egin dute herrialde azaleratu berrietan. Ekonomiak % 6,5 egingo du gora aurten eta % 6,2 2012an, aurreko txostenean % 6,6ko eta 6,4ko hazkundeak izango zirela esaten zenean.
Langabezia
Ansak zabaldutako zirriborroaren arabera, langabezia-tasak behera egingo du mundu guztian, baina eurogunean % 10ean mantenduko da.
Bestalde, langabezia-tasa % 20,1etik % 20,7ra igoko da Espainian. Italian, aldiz, langabezia % 8,2ra jaitsiko da aurten, baina 2012an % 8,5era igoko da. Zirriborroa irailaren 20an argitaratuko dute.
