Enpresak sortzeko eremu emankor baten alde egin du Patxi Lopezek

"Euskadi enpresa berriak sortzeko eremu emankor" bihurtzea behar-beharrezkoa dela azpimarratu du Patxi Lopez lehendakariak; izan ere, "talentuak erakartzeko lehia gertatzen ari da mundu osoan, eta gu ezin gara hortik kanpo geratu".

Hitzordu hau "etorkizuneko negozio emankor askoren haztegia izango da aurten ere", esan du gaur Barakaldon, BEC erakustazokan, Emprende 2011 abiatzeko ekitaldian.

Lehendakariaren ustez, "abentura berri bat abiatu nahi dutenek egin beharreko tramite burokratiko gogaikarriak murrizten ahalegindu behar dugu".

Horren harian, Euskadiko Ekintzaileentzako Zerbitzua sortu dutela nabarmendu du. Urrian hasiko da lanean, eta "ekintzaileei informazioa eta aholkua emateko bide guztiak batuko dituen bulegoa da".

Lopezek azaldu duenez, iaz Industria Sailak 10,5 milioi euro bideratu zituen ekintzaileen proiektuak bultzatzeko, eta aurreko ekitaldian, zortzi.