Turismo, Merkataritza eta Kontsumo Sailaren aurrekontua handitu egingo da EAEn

Eusko Jaurlaritzako Turismo, Merkataritza eta Kontsumo Sailaren aurrekontua % 8 haziko da 2021ean. Hala, 47,2 milioi eurokoa izango da, eta sektoreari lagunduko dio covid-19ak eragindako krisiari aurre egiteko.

Javier Hurtado Eusko Jaurlaritzako Turismo, Merkataritza eta Kontsumoko sailburuaren arabera, 15 milioi euro baino gehiago bideratuko dituzte koronabirusaren krisiak turismoan, ostalaritzan eta merkataritza sektorean izan dituen ondorioei aurre egiteko.

47,2 milioi horietatik, Turismo eta Ostalaritza Zuzendaritzak 17,1 milioiko aurrekontua izango du, eta zenbateko horretatik 8,3 milioi Basquetour Turismoaren Euskal Agentziari bideratuko zaizkio.

Turismo eta Ostalaritzak, gainera, 3,1 milioi euroko aurrekontua izango du “Covid Porgramaren” baitan, covid-19aren ondorioei erantzuteko.

Merkataritza Zuzendaritzak, bere aldetik, 18,5 milioi euroko aurrekontua izango du, eta Kontsumobide Kontsumoko Euskal Institutuak, berriz, 7,1 milioikoa.

Merkataritza ere pandemiaren ondorioei erantzuteko programaren onuradun izango da. 7 milioi euro bideratuko dituzte tokiko merkataritza txikia suspertzeko plan baterako eta kontsumoko pizgarrietarako.

Suspertze plana

Era berean, turismoa merkaturatzeko eta sustatzeko 257.000 euroko laguntza-programa bat aurreikusten da.

"Covid programa" horren hirugarren zatia 1,8 milioi euroko partida bat da, turismo-sektorea sustatzeko eta laguntzeko plan berri bat abian jartzeko.

Hala, Turismo eta Ostalaritza Zuzendaritzak 5,2 milioi euro baino gehiago inbertituko ditu guztira, eta horiei beste 1,4 milioi euro gehituko dizkie sustapenerako eta informaziorako.