Etxeko langileen baldintzak arautzeko legea bihar sartuko da indarrean

Bihar sartuko da indarrean etxeko langileen baldintzak arautzen dituen lege dekretua, etxeko langileei lanbide arteko gutxieneko soldata aitortzen diena eta astean gehienez 40 orduko lanaldia ezartzen duena.

Espainiako Aldizkari Ofizialak gaur argitaratu du Ministroen Kontseiluak azaroaren 11n onartu zuen erret dekretua. Orain arte 1985eko lege batek arautzen zuen langile horien egoera.

Lege berriak zehazten duenez, etxeko langilearen soldatatik gehienez % 30 kendu ahal izango da alojamenduagatik edo otorduak emateagatik.

Langileak bi soldata extra jasoko ditu urtean eta horren zenbatekoa gutxienez soldata minimoa izan beharko da.

Langileak enplegu zerbitzu publikoen bitartez edo baimendutako agentzien bidez kontratatuko dira, eta berdintasun printzipioa onartzeaz gain, erakunde horiek ezin izango dute inor diskriminatu arrazagatik, sexuagatik, adinagatik, erlijioagatik, iritzi politikoagatik, sexu joeragatik, egoera zibilagatik edo sindikatu batera afiliatuta egoteagatik.

Hemendik aurrera probaldi bat ezarri ahal izango da, baina ezin izango da bi hilabete baino gehiago luzatu, lan-hitzarmenak kontrakoa esaten ez badu, eta lan-harremanaren inguruan erabakirik hartzen bada gutxienez zazpi egun naturaleko epeaz abisatu beharko da.

Lanorduei dagokienez, asteko 40 orduak eginda, langilea ez da etxean egotera behartuta egongo.

Era berean, lan egun baten eta hurrengoaren artean gutxienez 12 orduko atsedenaldia egongo da, baina barne langileen kasuan, 10 ordura murriztu daiteke atsedenaldia.

Barne langileek gutxienez bi ordu izango dituzte egunero otordu nagusiak egiteko, eta ordu horiek lanordu gisara zenbatuko dira.

Era berean, etxeko langileek astean gutxienez 36 orduko atsedenaldia izango dute eta Langileen Estatutuan agertzen diren jai-egunak izango dituzte.

Oporrei dagokienez, 30 egun natural hartzeko aukera izango dute, eta gutxienez 15 jarraian hartu behar badituzte ere, oporrak zatika hartu ahal izango dituzte.

Kontratuak eteteko kalte-ordaina lan egindako urte bakoitzeko 20 egunekoa izango da bidegabeko kaleratzeen kasuan eta 12 egunekoa enplegatzaileak atzera egiten duenean.

Aldizkari Ofizialean azaltzen denez, legeak bihar indarrean dauden kontratu guztiei eragingo die. Enplegatzaileek urtebeteko epea izango dute egungo kontratua formalizatzeko.