Ekonomia -
Bilera Berlinen
Transakzioen inguruko akordiorik ez dute lortu Merkelek eta Cameronek
Hala eta guztiz ere, zorraren krisia konpontzeko beste aspektu batzuetan Alemania eta Britainia Handia ados daudela goraiptau du Alemaniako kantzelariak.
Erredakzioa
Finantza-transakzioei zerga bat ezartzeko akordiorik ez dute lortu gaur Angela Merkel Alemaniako kantzelariak eta David Cameron Britainia Handiko lehen ministroak. Berlinek eta Parisek transakzioei tasa bat ezartzea defendatzen dute.
Hala eta guztiz ere, zorraren krisia konpontzeko beste aspektu batzuetan Alemania eta Erresuma Batua ados daudela goraipatu du Merkelek. Euroguneko kideen diziplina fiskala mantendu eta ekonomiak dinamizatzearen beharrarekin bi buruzagiak ados agertu dira.
"Europa indartzeko erabaki irmoa hartu dugu", ziurtatu du Alemaniako Gobernuko buruzagiak prentsaurrekoan. Bi agintariek bilera egin dute Berlinen. Europar Batasuneko (EB) finantza-publiko eta pribatuei eragiten dieten arazoak konpontzeko akordioak bilatu dituzte buruzagiek.
David Cameron
Bestalde, adostasunak azpimarratu ditu Cameronek, baina bere hitzaldian aipatu ez diren gaiak izan dira protagonistak.
Merkatu amankomuna mantendu, aurrekontuen egonkortasuna inposatu eta euroguneko lehiakortasun ekonomikoa hobetu beharrarekin ados daudela nabarmendu du Britainia Handiko lehen ministroak.
