Cebek: 'Erreforma fiskalak ez dira enplegua sortzeko bideratu'

Cebek Bizkaiko patronalak astearte honetan deitoratu duenez, ondarearen gaineko zerga berreskuratzeko Euskadiko Ogasunen erabakia "aurrekontu arrazoiengatik" hartuta izan da eta "ez inbertsioa suspertzeko eta enplegua sortzeko".

Bilbon eskainitako prentsaurrekoan Fernando Olmos Cebekeko presidenteordeak adierazi du erreforma fiskala "partziala eta zorizkoa" dela. Olmosentzat, edozein erreforma fiskal jarduera ekonomikoa berpiztera zuzendu behar da, eta ez "aurrekontuen mesedetan egin, oraingoan bezala". Horren harian, Olmosek esan du duela bi hilabete Confebaskek eta hiru lurraldeetako patronalek erreforma fiskalen proposamen bat aurkeztu zutela.

Cebeken ustez, fiskalitateak "inbertsioa suspertzeko eta enplegua sortzeko" balio behar du, eta, horretarako, "sozietateen gaineko zergan dedukzio berriak" eskatu ditu, "Europa mailan dagoen batez bestekora hurbiltzeko", eta "exentzio fiskalak, onurak berriro ere inbertitzen dituztenentzat". Hiru lurraldeek zerga kontuen inguruan elkarrekin bat ez egiteak ondorioak ekarriko dituela ere ohartarazi du Olmosek, Gipuzkoak ez duela Araba eta Bizkaiarekin bat egin ikusita.

Cebekeko buruzagiaren iritzian, ez da ezberdintasunik egon behar lurraldeen artean, "hiru lurraldeetako herritarrek ahalegin bera egin behar baitute". Bestela, horrek eragina izango du Aldundiek Eusko Jaurlaritzaren aurrekontuari egiten dizkioten ekarpenetan.