Jaurlaritzak 674 milioi euro bideratuko ditu familiei laguntzeko

Eusko Jaurlaritzak familiak babesteko hirugarren plana onartu du gaur goizean. Guztira, 675 milioi euroko aurrekontua izango du 2012an hasi eta 2015era arte.

Berrikuntza, aurreko planekiko, seme-alaba bakoitzeko diru-laguntza urte gehiagoz jaso ahal izango dela.

Jaiotzak sustatzeaz gain, beste helburu nagusia familiaren zaintza eta lana uztartzeko erraztasunak ematea izango da, eta horretarako agente sozial eta ekonomikoak inplikatu nahi dituzte, sindikatuak eta Confebask besteak beste.

Aurrekontu ia guztia (607 milioi euro) familiei emandako diru-laguntza zuzenetan joango da. 2013. Urtetik aurrera, gainera, laguntza horiek handitzea aurreikusten dute, Planaren amaierarako 4 urteko haurrek ere jaso dezaten.

Jaurlaritzak onartu duen egitasmoaren arabera, 900 euro jasoko lukete familiek haurrak bi urte bete arte eta 720 euro 4 urte arte. Hirugarren seme-alaben kasuan, laguntza jasotzeko epea 10 urtera luzatuko da.

Baina, ñabardura egiten da planaren testuan, izan ere, laguntza horiek egoera ekonomikoaren araberakoak izango dira eta Jaurlaritzak dirurik ez badu ez dira laguntzak handituko.

Kontziliazioa sustatzea da beste erronka eta horretarako, Batzar Nagusiei lana eta familia uztartzen laguntzen duten enpresentzat kenkari fiskalak onartzea eskatzen dio Jaurlaritzak. Era berean, sindikatu eta enpresa-elkarteekin lan ordutegien malgutasuna adostu nahi dute.

Espainiako Gobernuari begira, familia ugariaren definizioa zabaldu nahi du, guraso bakar eta bi seme-alaba edo gehiago dituzten horiek ere familia ugaria izan daitezen.