Ekonomia -
Europar Batasunean
Arrantzaleen 'puntukako karneta', indarrean
Karnet honekin, arauak betetzen ez dituzten arrantzaleek, armadoreek eta kapitainek puntuak jasoko dituzte eta, gehienezko 90 puntuak lortuz gero, lizentzia betiko kenduko diete.
Erredakzioa
Urtearen hasierarekin batera, Europar Batzordeak indarrean sartu du arrantzaleen 'puntukako karneta'. Europak jarri duen kontrol neurri berria da, "flota guztiek eskubide berberak izan ditzaten".
Karnet honekin, arauak betetzen ez dituzten arrantzaleek, armadoreek eta kapitainek puntuak jasoko dituzte eta, gehienezko 90 puntuak lortuz gero, lizentzia betiko kenduko diete.
Hori gertatu aurretik, arrantzaleek lau abisu jasoko dituzte, eta puntuen arabera dagokien isuna jasoko dute.
Zigortuko diren jokabideak hauek izatea adostu dute Europan: matrikulak edo motorrak manipulatzea, arrainen gutxieneko tamaina ez errespetatzea, galarazitako garaian arrantza egitea edota esparru debekatuetan arrantzatzea.
Araudi berri honek Europar Batasuneko herrialde guztietan izango du eragina.
Gipuzkoako arrantzaleen kofradiak begi onez ikusi du neurria eta baxurako arrantzan puntukako karnetak ez duela hainbesteko eraginik izango uste dute.