Ekonomia -
Murrizketak salatzeko
Sindikatu abertzaleek lanuzteak eta manifestazioak deitu dituzte
ELA, LAB eta STEE-EILAS sindikatuek manifestazioak deitu dituzte hilaren 26rako EAEko hiriburuetan eta lau orduko lanuzteak egingo dituzte otsailaren 9an funtzio publikoan.
Erredakzioa
Jaurlaritzak funtzio publikoan egingo dituen murrizketak direla eta, ELA, LAB eta STEE-EILAS sindikatuek udaletxeetako eta diputazioetako langileei dei egin diete datozen asteotarako antolatu dituzten mobilizazioetan parte hartzeko.
Lantokietan asanbladak eta kontzentrazioak egiteaz gain, manifestazioak antolatu dituzte EAEko hiriburuetan hilaren 26rako eta lau orduko lanuzteak funtzio publikoan otsailaren 9an.
Sindikatu abertzaleek gogor kritikatu dituzte Espainiako Gobernuak abenduaren 30ean onartutako dekretua eta Eusko Jaurlaritzak urtarrilaren 10ean iragarritako hitzarmena, "murrizketa horiek zerbitzu publikoari eraso egitea eta langileen baldintzak okerrera egitea suposatzen dutelako".
Horrenbestez, iragarritako neurriak indarrean ez jartzeko eta "murrizketen politikari" behin betiko uko egin diezaiotela exijitu diete bi gobernuei. Horrez gain, Eusko Jaurlaritzari, udalei eta diputazioei "negoziaziorako marko propioa" babesteko eskatu diete, "Madrilen hartutako erabakien menpe egon beharrean".
"Euskal Herriko langileek eta gizarteak erabaki behar dute zer-nolako funtzio publikoa eta zerbitzuak izan behar ditugun", azpimarratu dute.
