Enpleguaren sorrerak % 0,6ko jaitsiera izan du EAEn, 2011n

Enpleguaren sorrerak % 0,6ko jaitsiera izan zuen 2011n, EAEn ekonomiak izan zuen hazkuntza eskasaren ondorioz. Zerbitzuen sektorean baino ez ziren lanpostuak sortu.

Euskal Estatistika Erakundeak 2011ko laugarren hiruhilekoari buruzko datuak eman ditu gaur goizean. Txostenaren arabera, iaz urte arteko Barne Produktu Gordinaren hazkuntza % 0,6ko izan zen, Eusko Jaurlaritzak aurreikusitakoa baino puntu bat gutxiago. 2011n, euskal ekonomiak beherako joera izan zuen: lehen hiruhilekoan % 0,9ko hazkuntza izan zuen; bigarren hiruhilekoan, % 0,8koa; hirugarren hiruhilekoan, % 0,6koa; eta azken hiruhilekoan, % 0,2koa. Gainera, hazkuntza datuek azken zazpi hiruhilekoetan inoiz ez dute % 1a gainditu eta horrek markatzen du, hain zuzen ere, lanpostu sorreraren eta galeraren arteko ezberdintasuna. Iaz, zerbitzuen sektorean bakarrik sortu lanpostu berriak (% 9ko igoera). Eraikuntza sektorean beherakada % 7,8koa izan zen; lehen sektorean, % 3,9koa; eta industrian, % 1,9koa.