CCOOk eta UGTk atzera egiteko denbora duela esan diote Gobernuari

Ignacio Fernandez Toxo CCOOren idazkari nagusiak eta Candido Mendez UGTrenak lan-erreforman atzera egiteko denbora duela ohartarazi diote Espainiako Gobernuari.

Ongizate estatuaren babeserako Plataforma Soziala aurkezteko emandako prentsaurrekoan, bi buruzagi sindikalek azpimarratu dute atzo lan erreformaren kontra egindako manifestazioak Francoren garaitik egindako garrantzitsuenak izan zirela.

Toxok espero du Gobernuak "ongi irakurriko duela" atzo Espainiako 57 hiritatik jasotako mezua, eta mobilizazio gehiago egotea saihestuko duela.

Adierazi duenez, ez du Gobernuaren deirik jaso negoziazio prozesua abiarazteko, baina "denbora du oraindik".

Hori dela eta, Kongresuan legea bozkatu aurretik patronalarekin eta sindikatuekin negoziazio mahai bat abian jartzeko eskatu dio Rajoyri, adostutakoa zuzenketa bezala onartu ahal izateko.

Toxoren arabera, erreforma aldatzeko leku desberdinak daude, izan ere, aipatu negoziazio mahaiaz gain, otsailaren 8an, dekretua onartzen denean, zuzenketak aurkezteko garaia irekiko da.

Horren harira, hainbat talde parlamentariorekin bildu dela eta ostegunean PPren txanda izango dela iragarri du.

Aurrekariak

Bai Toxok bai Mendezek uste dute erreformari zuzenketak jarri beharko litzaizkiokeela, 2002an gertatu zen bezala. Orduan, greba orokor baten ostean, Gobernuak aldatu egin behar izan zuen Kongresuak onartu berri zuen lan-erreforma.