Ekonomia -
Hiruhileko kontuen aurrerapena
Euskadiko BPGa % 0,8 hazi da udan, aurreko hiruhilekoarekin alderatuta
Eustatek aurreratutako datuen arabera, EAEko ekonomia % 0,8 hazi da uztailetik irailera, aurtengo bigarren hiruhilekoarekin konparatuta. Enpleguak ere % 0,6 egin du gora.
AGENTZIAK | EITB MEDIA
Euskal Autonomia Erkidegoko Barne Produktu Gordina (BPG) % 0,8 hazi da 2021eko uztailetik irailera, aurreko hiruhilekoarekin alderatuta. Bestalde, enpleguak ere % 0,6 egin du gora, Eustat Euskal Estatistika Erakundeak egindako hiruhileko kontuen aurreikuspenen arabera.
2020ko epe bereko datuekin alderatuta, EAEko BPGaren hazkundea % 3,8koa izan da; izan ere, orduan covid-19aren pandemiari eusteko hartutako murrizketek eragin nabarmena izan zuten.
Enpleguari dagokionez, lanaldi osoko lanpostuen kopuruak % 0,6 egin du gora udako hilabeteetan, aurreko hiruhileko datuekin alderatuta, eta % 3,2, berriz, 2020ko udako datuekin alderatuta.
Halaber, Barne Produktu Gordina bostgarren hiruhilabetez jarraian hazi da. Gaurkoa datu aurreratua da, abendu hasieran emango baitu Eustatek behin betiko datua.