Telefonicari jarritako 3 milioiko isuna baliogabetu dute

Salaketaren jatorria 2007an dago; Telefonicak salneurri handiagoak ezarri zizkion, orduan, bere bezeroei, Euskaltel telefono konpainiaren bezeroei deitzeagatik. Euskaltelek "diskriminatzailetzat" jo zuen egoera hori eta Lehiaren Defentsarako Euskal Auzitegian salatu zuen.

Auzitegi horrek arrazoia eman zion Euskalteli, eta 3,2 milioi euroko isuna ezarri zion otsailean Telefonicari. Telefonicak helegitea jarri zuen EAEko Justizia Auzitegi Nagusian, eta, orain, helegite hori onartu dute, bi epairen bidez.

Gaur ezagutu diren bi epaiak antzekoak dira eta, horietan jasotzen denaren arabera, konpainia ezberdinetako bezeroen arteko deiak "sare batetik bestera pasatu behar dira" eta Euskaltelek (helmugako sareak) kobratu egiten zion jatorrizko sarearen jabe zen konpainiari, horregatik. Salaketa egin zenean, kobratzen zen zenbatekoa librea zen.

Euskaltelek Vodafoneri baino askoz gehiago kobratzen zion Telefonicari; hala ere, garai hartan, Euskaltelek Vodafoneren sarea erabiltzen zuen, ez baitzuen sare propiorik.

Telefonicak Euskaltelen eskaintza hori baztertu zuen. Ondoren, Telekomunikazioen Batzorde Nazionalaren arbitrajea eskatu zuen (horren bere alde egin zuen) eta Telefonicako bezeroek Euskaltelekoei egiten zizkieten deien salneurria handitzea erabaki zuen. Euskaltelek "diskriminatzailetzat" jo zuen neurria eta Lehiaren Defentsarako Euskal Auzitegian salatu zuen.

Oraingoz, azken bi epai horien bitartez, EAEko Justizia Auzitegi Nagusiak arrazoia eman dio Telefonicari, bere jokabidean ez baitu "erruduntasunik" sumatzen, baina Auzitegi Gorenean errekurtsoa jartzeko aukera du orain Euskaltelek.