EAJk ez du negoziazioa itxitzat ematen eta AHTri buruzko zehaztapenak espero ditu

Aitor Esteban EAJk Kongresuan duen bozeramaileak asteazken honetan esan duenez, oraindik ez du itxitzat eman Espainiako Gobernuarekin 2022ko Estatuko Aurrekontu Orokorrei babesa emateko negoziazioa, nahiz eta dagoeneko 40 zuzenketa baino gehiago sartu dituen kontuetan, eta Abiadura Handiko Trena (AHT) Euskal Autonomia Erkidegora iristeko zehaztasun gehiago espero dituela esan du: "Hau luzerako doa", esan du Estebanek.

Estebanek azaldu duenez, aurten aurrekontuen negoziazioa "ohiz kanpokoa izan da", eta "ez EAJren borondateagatik", baizik eta Espainiako Gobenruarekin izandako negoziazio eta denborak "nola garatu diren" ikusita, bi aldeek ez baitute lortu aurrekontu akordio bat ixtea, eta orain arte zuzenketa akordio zehatzetara mugatu baitira.

"Ezin dugu esan negoziazioa itxitzat ematen dugunik, hitz egiten jarraituko baitugu", adierazi du Estebanek, eta kontuak "hobetu" eta eskari berriak sartu nahiko lituzketela gaineratu du. "Gai batzuk interesatzen zaizkigu, eta eztabaidatu nahi ditugu", esan du. Halaber, aurrekontuen tramitazioa ez dela Kongresuan amaitzen, baizik eta Senatuan ere bozkatu behar direla adierazi du, eta han EAJk ere bere botoak baliatuko dituela gaineratu du.

Xehetasun gehiago eman gabe, EAJren Legebiltzarreko bozeramaileak azaldu du AHTri eta EAEko hiriburuetara iristeko zehaztasunari buruzko zuzenketak sartu ahal izatea espero duela, eta hori aurrekontu akordioari lotzea espero duela.

Negoziazio horretan EH Bildu bazkide gisa finkatzeak eragin ote duen galdetuta, Estebanek esan du ez daudela "haserre", eta Espainiako Gobernua behartuta dagoela "aurrekontuak ziurtatzera". Hortaz, taldeek "beste batzuek duten legitimitate bera" dute negoziatzeko. "Hori logikoa da, bakoitzak bere kartak jokatzen ditu", esan du.