CCOOk eta UGTk greba erregistratu dute: 'Atzerako kontaketa hasi da'

Ignacio Fernández Toxo eta Candido Mendez CCOO eta UGT ko idazkari nagusiak, hurrenez hurren, martxoaren 29ko greba orokorra Lan Ministerioan erregistratu dute, zenbait sindikalista pankartekin lagun zituztela.

Izapidea bete ondoren, sindikatuetako liderrek prentsaurrekoa eman dute, 'Martxoaren 29a, Greba Orokorra. Guztiarekin amaitu nahi dute' leloa zuen pankarta atzean zutela. Bertan esan dutenez, "gaur greba orokorrerako atzerako kontaketa hasi da", UGTko idazkari nagusiaren hitzetan.

Gauzak horrela, sindikatuak Gobernuarekin negoziatzeko prest agertu dira, berriro ere, greba bertan behera uzteko azken ahaleginean. Hala ere, greba geldiezina dela ziurtatu dute. Toxoren arabera, "negoziazioa erabilita, gauzak bideratzeko modua dago, baina denbora agortzen ari da".

Bestalde, sindikatuen arduradun nagusiek greba "saihestezina" dela azpimarratu dute, Gobernuaren jokaera ikusita.

Erreformak "ez dauka justifikaziorik"

Gai berberaren harira, Toxoren arabera, "Gobernuak azken hiru hamarkadetan izandako elkarrizketa soziala deuseztatu nahi duela" esan du, egindako lan-erreformaren premia ez baitago justifikatuta. Izan ere, Gobernuak berak aitortu bezala, epe laburrera erreformak ez du lanposturik sortuko.

"Ez dakit Gobernuak 2002ko gidoia errepikatu nahi duen ala ez", esan du Toxok Aznarren Gobernuak egindako "dekretazo"ari erreferentzia eginda. Orduan greba orokorra deitu zuten eta Gobernuak atzera egin behar izan zuen, sei ministroren dimisioak bultzatuta. "Ez genuen egoera honetara iritsi behar", gaineratu du CCOOko liderrak.

Euskadiko CCOOk eta UGTk gizarte osoaren esfortzua eskatu dute

Euskadiko CCOO eta UGT sindikatuek euskal gizarte osoari, ez langileei bakarrik, eskatu diete "lan-erreformaren erasoari erantzuteko".

Unai Sordo eta Damaso Casado CCOOren eta UGTren idazkari nagusiek martxoaren 29ko greba orokorrerako deialdia erregistratu dute gaur Eusko Jaurlaritzak Bilbon duen egoitzan.

Horren aurretik, Casadok eta Sordok azpimarratu dute erreformak ez diela lanean ari direnei soilik kalte egingo, baizik eta langabeen esperantzari eta gazteen etorkizunari ere bai.

Sordok ukatu egin du erreforma langabeziari aurre egiteko tresna izango dela. "Lanpostu gehiago suntsitzeko soilik balioko du, erraztu eta merkatu egiten baitu hori, eta zerbait errazagoa eta merkeagoa denean, lehentasun bihurtu ohi da enpresa askotan", gaineratu du.

Damaso Casado UGT-Euskadiren idazkari nagusiak, bere aldetik, "langileak, langabeak, gazteak, kaltetuenak izango direnak, eta pentsiodunak" deitu ditu greba orokorrean parte hartzera.