Ekonomia -
Bizkaiko Foru Aldundia
Ogasun ikuskaritzak Gilen espedientea filtratu duen ikertuko dute
Jose Luis Bilbao diputatu nagusiaren hitzetan, ikerketa "azkar" bat egingo dute, egun gutxi barru "emaitzak izateko".
Erredakzioa
Bizkaiko Ogasun ikuskaritzak Melchor Gil Bizkaiko PSEko lehendakariordearen espedientea filtratu duen ikertuko du Aldundiak, Jose Luis Bilbao diputatu nagusiak adierazi duenez. Patxi Lopez lehendakariaren koinatuari diru-sarrera irregularrak izatea egotzi dizkiote.
Bizkaiko Foru Aldundiak Melchor Gil ikertzeko eskatu zion iragan astean Fiskaltzari, ustezko diru-sarrerak irregularrengatik.
Radio Euskadiri eskainitako elkarrizketa batean, Bilbaok esan du ikerketa "azkarra" egingo dutela, "egun gutxi batzuetan emaitzak izateko".
Ogasunaren ikuskaritzak Gilen zergak aztertzerakoan diru-sarrera irregularrak atzeman zituen, politikari honek PFEZ pertsona fisikoen errentaren gaineko zergan 419.000 euro ezkutatu omen zituelako.
Jose Antonio Pastor PSE-EEko bozeramaileak esan zuenez, ustezko irregulartasunak argitaratzen dituen txostenaren filtrazioa soilik "Ogasuneko ordenagailutik" atera daiteke.
Horri erantzuteko, Jose Luis Bilbaok esan du iragan astean barne ikerketa bat ireki zutela, informazio hori Ogasun zerbitzuetatik atera den argitzeko.
"Ogasun ikuskaritzako ordenagailu batetik atera dela entzun dut, baina nik ez daukat horren berririk".
Foru Aldundiak duen informazioaz publikoki mintzatuko ez dela adierazi du Bilbaok, "zergadunen informazioaz ez garelako inoiz mintzatzen".
Iruzur fiskalaren aurka hartutako neurriak eta Ogasun saileko langileen lana goraipatu du diputatu nagusiak. "Gure babes osoa izango dute beti", adierazi du.
