Ekonomia -
Zergak
EAEko ogasunek gainditu egin dute pandemiaren aurreko diru-bilketa
Arabak, Bizkaiak eta Gipuzkoak azken bi urteetan baino diru-bilketa handiagoarekin itxi dute 2021a. Kontuak hala, hiru ogasunek, guztira, 15.962 milioi euro batu dituzte, 2020an eta 2019an baino % 14,4 eta % 3,1 gehiago, hurrenez hurren.
EITB Media
EAEko hiru foru aldundiek pandemiaren aurreko garaietan baino diru-bilketa handiagoa eginda amaitu dute 2021a: Arabako Ogasunak 2.486,9 milioi euro bildu ditu; Bizkaikoak, 8.136,1 milioi euro; eta Gipuzkoakoak, 5.340 milioi euro. Horrela, guztiek hobetu dituzte 2020an, pandemiak eragindako geldialdi ekonomikoak markatutako urtean, lortutako diru-sarrerak, eta baita 2019an bildutakoa ere.
Kontuak hala, hiru ogasunek, guztira, 15.962 milioi euro batu dituzte, 2020an eta 2019an baino % 14,4 eta % 3,1 gehiago, hurrenez hurren.
Igoera orokor horren aurrean, Ramiro González Arabako ahaldun nagusiak nabarmendu du albiste positiboa dela hori, "itxaropena pizten duena, gure ekonomia-sarearen gaitasunak eta indarguneak egiaztatzen duena".
Bestalde, Bizkaiko Foru Aldundiak esan du orain arte lurraldean lortutako diru-bilketa handiena dela, eta jarduera ekonomikoaren susperraldiaren hasiera islatzen duela. Hala ere, azpimarratu du kontuan hartu beharreko beste faktore batzuek ere eragiten dutela hazkunde hori, ezohiko moduan lortutako diru-sarrerak baitira, "eta aurreko ekitaldiekiko konparazioa desitxuratzen dute".
Besteak beste, Bizkaiak nabarmendu du igoera handia izan dela (% 885,9) sarien gaineko karga bereziaren bilketan. Horri esker, 30 milioi euro sartu dituzte 2021ean, 2020an sartutako 3 milioien euroen aldean.