Bielsa: 'Argentinak etorkizunerako iturri bat berreskuratu du'

Ez da ohikoa futbol entrenatzaileek gai ekonomikoez edo nazioarteko gatazkez hitz egitea, baina Marcelo Bielsa Athletiken entrenatzaileak YPF petrolio konpainiaren inguruan Espainian sortu den polemikaz hitz egin zuen atzo.

Europa Ligako finalaurrekoetan Portugalgo Sportingen kontra jokatu aurretik emandako prentsaurrekoan, kazetari batek Argentinako Gobernuak YPF nazionalizatzeko hartu duen erabakiaren inguruan galdetu zion Bilesari eta honek erantzun hau eman zion: "Gustura nago nire herrialdeak etorkizunerako iturri bat berreskuratu duelako".

Hala eta guztiz ere, erantzun aurretik, Bielsa kritiko agertu zen kazetariaren galderarekin, izan ere, "ez dagokit galdera horri erantzutea".