Ekonomia -
Epaiketa, Irungo Ogasuna
Bravok zorren beherapenak eskaintzen zituen, lekukoen arabera
Lekuko batzuek epaiketan adierazi dutenez, Irungo Ogasunaren zuzendari ohiak zorra esku-dirutan ordaintzea exijitzen zien "beherapenaren" truke.
Erredakzioa
Carlos Hernaez Ortiz de Urbinak, Irungo Garo aholkularitza enpresaren jabeak, aitortu du Jose Maria Bravo Irungo Ogasuneko zuzendari ohiarekin zergen "beherapenak" adostu zituela.
Lekukoen txanda izan da gaur Irungo Ogasuneko ustezko iruzurraren epaiketan eta Ministerio fiskalak deituta deklaratu dute gaur batzuk.
"Bai, Bravok nire zorra murriztu zuen, ez dakit % 35eko, 40ko edo 50eko beherapena izan zen", adierazi du. Aholkulariak esan du ez zekiela zer gertatzen zen "ordaindu gabe geratzen zen zorrarekin".
Gainera, zorraren ordainketa "esku-dirutan" egin behar omen zen, Bravok hala aginduta.
Lekukoak
Beste lekuko batzuk baieztatu egin dute aholkulariak esandakoa. Bravoren bulegora joaten omen ziren eta beherapen baten truke zorra "esku-dirutan" ordaintzen zuten.
Lekuko batek esan du Bravo jarri zela berarekin harremanetan eta 500.000 pezetaren truke milioitik gorako zorra "kitatuko" ziola hitz eman ziola.
Eguerdia aldera amaitu da gaurko auzi saioa. Bihar berriro ekingo diote epaiketari, 09:30ean, eta lekukoek deklaratzen jarraituko dute.
