Europako Batzordea, 'kezkatuta' Red Electricaren nazionalizazioarekin

Europako Batzordea "kezkatuta" agertu da Boliviako Gobernuak Red Electrica Españolaren filiala nazionalizatu eta gero, eta herrialde horretako agintariek Espainiarekin sinatutako inbertsio akordioak "guztiz" betetzea espero duela adierazi du.

"Tankera horretako ekintzek seinale negatiboa helarazten diete nazioarteko inbestitzaileei", ohartarazi du John Clancy Merkataritza bozeramaileak.

Argentinak YPF nazionalizatu zuenean ere kezka agertu zuen Europako Batzordeak.

Kasu horretan, buruzagi europarrek ohartarazi zuten operazioa arriskutsua dela "enpresa-giroarentzat eta atzerriko inbertsioentzat".

Estatu kideen atzerriko inbertsioak Europar Batasunaren eskuduntza bihurtu dira Lisboako Itunarekin, baina oraindik ere oinarrizko arauak eratzen ari dira inbertsio horiek defendatzeko, presio diplomatikoa baino urrunago joan ahal izateko.