Ekonomia -
Diputatuen Kongresua
Rajoyk euroaren aldeko 'mezu argia eta sendoa' eskatu du
Eskari berbera egin du zor publikoaren jasangarritasunarentzat ere. Hala eta guztiz ere, Espainiako presidenteak ez du argitu nori egin dion eskaria.
Erredakzioa
Mariano Rajoy Espainiako Gobernuko presidenteak euroaren aldeko eta Euroguneko estatuen zor publikoaren jasangarritasunaren aldeko "mezu argia eta sendoa" eskatu du.
Diputatuen Kongresuan kontrol saioan agerraldia egin ostean, Mariano Rajoyk hedabideekin hitz egin du mezu hori eskatzeko, baina nori eskatzen dion argitu gabe.
Bestalde, Rajoyk argi adierazi nahi izan du azken orduotan ez dutela Espainiaren balizko eskuhartzeaz edo bestelako laguntzez hitz egin.
Hala ere, gobernuburuak gogorarazi du Espainiako arrisku sariaren gorakadak zailtasunak eragin dituela, baina "lehentasuna denon zor publikoaren jasangarritasuna" dela.
Azken orduotan Angela Merkel Alemaniako kantzillerrarekin edo Europar Batasuneko beste buruzagiren batekin hitz egin ote duen galdetuta, Rajoyk erantzun du ia astero hitz egiten duela buruzagi europarrekin.
