Ekonomia -
EITB DATA
Tasa finko eta aldakorreko hipotekak parekatu egin dira Euskadin
Gainera, etxebizitza estandar bat duen familia batek diru-sarreren % 33 bideratu behar du hipoteka ordaintzera; 2007-2008 bitartean diru-sarreren % 50 bideratu behar izaten zuen batez beste familia batek.
Iker Gonzalez | eitb media
Tasa finkoa duten hipotekek aldakorra duten hipoteken mailara heltzea lortu dute Euskadin, ia erabat parekatuta izatea lortu arte. Zehatz-mehatz, aurtengo lehen hiruhilekoan, sinatutako hipoteken % 47,2 tasa finkoko hipotekak izan dira, eta % 52,4 tasa aldakorrekoak.
Hala jaso du EITB DATA azken inkestak, oraingo honetan etxebizitzaren merkatuaren inguruko egoeraren erradiografia egin duenak.
Finko eta aldakorreko modalitateen joera aldaketa 2015-2016an izan zen, finkoa hondar-balioa izatetik hipoteken laurdena hartzera igaro zen eta. Hortik aurrera, igoera esponentziala izan zuen, hipoteken erdia finkoak izatera heldu arte.
Hipoteka, diru-sarreren heren bat
Bestalde, etxebizitza estandarra (80 metro) duen familia batentzat, hipoteka ordaintzeko diru-sarreren % 33 bideratu behar izaten zuten 2021ean, Estatuan.
Inoizko kopururik altuena higiezin eta finantza burbuilaren eztandaren atarian jazo zen, etxebizitza bateko bizilagunak diru-sarreren % 50 baino gehiago bideratzera behartuta egon baitziren. 2016 eta 2017 artean, aldiz, % 31 azpitik egon da zifra hori.
2020-2021ean osatutako hipoteken zenbatekoari dagokionez, bai zenbateko osoak baita batez bestekoak ere, ez dute 2008ko krisialdiaren aurreko baloreak izatea lortu, nahiz eta susperraldian egon.