Ekonomia -
Mobilizazioak
Lanuzte eguna sektore publikoan, murrizketen aurka
LABek bi orduko lanuzteak deitu ditu EAEn; eta ELAk, LABek eta CCOOk greba orokorra Nafarroan.
Erredakzioa
EAEko eta Nafarroako sektore publikoko langileak mobilizazioak egitera deituta daude gaur murrizketen aurka.
Hain zuzen ere, EAEn, LAB sindikatuak bi orduko lanuzteak deitu ditu, 11:00etatik 13:00etara. Gainera, goizean elkarretaratzeak egingo ditu, eta arratsaldean manifestazioak.
Hasieran, ELA, LAB, EILAS eta ESK sindikatuek 24 orduko greba deitu zuten gaurko, baina ondoren ELAk eta EILASek bertan behera utzi zuten, eta LABek eta ESK-k bi orduko lanuztera murriztu zuten deialdia.
ELAk eta EILASek "borroka eta mobilizazio" eguna deitu dute gaurko, baina ez dute lanuzterik egingo.
Nafarroan, ELA, LAB eta CCOO sindikatuek 24 orduko greba deitu dute sektore publikoan. Horri, gainera, LAB, EILAS, CCOO, AFAPNA, ANPE, CSIF, ELA eta UGT sindikatuek hezkuntzaren sektorean deitutako greba gehitu behar zaio. Hezkuntzako hirugarren greba eguna izango da, hilaren 22an eta 29an egindakoen ostean.
Protesta eguneko ekitaldi nagusia manifestazio bateratu bat izango da. 12:00etan abiatuko da, Iruñeko autobus geltoki zaharretik, eta Nafarroako Gobernuaren egoitzaren aurrean bukatuko du ibilbidea.
10:00etan, elkarretaratzeak egingo dituzte hainbat herritan, hala nola Burlatan, Atarrabian, Huarten, Antsoainen, Zizurren, Tafallan, Lizarran eta Altsasuan.
