Europako Banku Zentralak 0,25 puntu igoko ditu gaur interes tasak, aurreikuspenen arabera

Europako Banku Zentralak galga jarriko dio ostegun honetan interes tasen igoera "biziari". Aurreikuspenak betez gero, 0,25 puntu igoko ditu tasak.

Gaurko bileran hartuko dute azken erabakia. Dena den, egungo agertokiak ez du martxokoarekin zerikusirik, baretu egin baita finantza merkatuen egoera.

Apirilean, euroguneko urte arteko inflazioa hamarren bat igo zen, martxokoarekin alderatuta. Hain zuzen ere, % 7rainoko igoera izan zuen. Kontrara, azpiko inflazioa, energia eta elikagai freskoak kontuan hartzen ez dituena, % 5,6raino jaitsi zen, aurreko urteko hilabete bereko datuekin erkatuta. 

Gainera, aste honetan Banku Zentralak eman dituen datuen arabera, lehen hiruhilekoan eten egin da enpresei emandako kreditu kopurua, bai eta hipoteka kredituena ere.

Bankuen aurreikuspenek diote joera horri eutsiko diotela kredituek hurrengo hilabeteetan ere.

Iazko uztailean hasi zen Europako Banku Zentrala interes tasak igotzen. Harrezkero, sei aldiz igo ditu jarraian tasak, % 0tik hasi eta % 3,5eraino.

AEBko Erreserba Federalak 0,25 puntu igo ditu interes tasak

Bestalde, AEBko Erreserba Federalak bart iragarri du interes tasak 0,25 puntu igoko dituela. Urtebetean izandako hamargarren igoera da atzokoa. Hala, % 5 eta % 5,25 bitartean daude orain tasak.

Hala ere, oraindik ez dute argitu azken igoera izango den ala ez.