Autonomiak finantzatzeko eredua aldatzeari ezetz esan dio PPk

Urriaren 2ko presidenteen Konferentzia egungo finantzaketa autonomikoaren eredua ebaluatzera mugatuko da, ondorioz, ereduaren erreforma atzeratu egingo da, oraingoz. Europari “batasun” irudia ematea izango du helburu bilerak.

Konferentzia hori prestatzeko bileran, Soraya Saenz de Santamaria presidenteordea eta Cristobal Montoro Ogasun eta Administrazio Publikoen ministroa sailburuekin bildu dira. Biek argi utzi dute bertan Europar Batasunari “batasun irudia” helarazi behar zaiola; hori dela eta, finantzaketaren gaia bigarren mailakoa izango da.

PPren egoitzan izandako prentsaurrekoan, Maria Dolores de Cospedal PPko idazkari nagusiak (bere alderdia buru den erkidegoen bozeramaile izango da) esan duenez, ez da unerik egokiena finantzaketa eredua “aldatzeko”, eta ebaluatzeko garaia dela nabarmendu du.

Cospedalen ustez, egungo eredua aztertzeko (PPk ez zuen babestu) garaia da orain, baina ez “parametro berriak hautatzekoa”.

Moncloan izandako bileraren ostean, Alonso Rueda Galiziako Presidentetza ordezkariak “batasun irudia” ematearen alde egin du, egun bateko Konferentzian finantzaketa gaia sakon eztabaidatzea Europar Batasunarentzat “suntsigarria” izango litzatekeelako.

Rajoy: ‘Finantzaketa ereduaren erreforma ez da lehentasuna’Mariano Rajoy Gobernuko presidenteak Espainia konstituzionalaren alde egin du, eta finantzaketa eredu autonomikoaren ereduak ez duela lehentasuna nabarmendu du, “ez dagoena banatzea” planteatzea izango litzatekeelako.

Rajoyk hitzok esan ditu New Yorkera iristean, Nazio Batuen Erakundeko 67. Batzorde Orokorreko saioetan parte hartzeko ekindako bidaian.