Osakidetzak esterilizazio-zentral berri bat jarri du martxan Mendaroko Ospitalean

Osakidetzak esterilizazio zentral berritzaile bat jarri du martxan astelehen honetan Mendaroko ospitalean, 1,4 milioi euroko inbertsioa eginda. Zerbitzu berriak erietxearen bilakaera teknologikoa dakar, asistentzia, lan segurtasun, eraginkortasun ekonomiko eta ingurumen babes handiagoa emanez.

Esterilizazio zentral berriak estaldura emango die Mendaroko eta Eibarko ospitaleei, Eibarko anbulatorioari, Elgoibar, Torrekua, Deba eta Ermuko osasun zentroei eta Itziar, Mendaro, Soraluze, Mallabia eta Mutrikuko kontsultategiei, eta 75.000 pertsonatik gorako biztanleriaren arretaren kalitatean eragingo du.

Osakidetzak jakinarazi duenez, esterilizazio prozesu guztiak unitate berrian zentralizatuta daude, Europako eta nazioarteko araudiaren arabera prozesatuta, modu bakarra baita produktu bat "esteril" dela ziurtatzeko.

Mendaroko ospitaleak dituen instalazio berriek punta-puntako aurrerapenak dituzte. Horiei esker, aurreko ekipamenduarekin alderatuta, jarduera % 15 handituko da eta garbi-zikin zirkuituak gurutzatzea eragotziko da.