Ekonomia -
SAKANA
Enplegua bermatzeko laguntza eskatu du Sunsundeguiko enpresa batzordeak
Hartzekodunen konkurtsoan den Altsasuko lantegiaren etorkizuna ziurtatzeko eragile sozial eta politikoen inplikazioa eskatu dute langileek, eta manifestazioa deitu dute urtarrilaren 19rako.
AGENTZIAK | EITB MEDIA
Sunsundeguiko enpresa batzordeak Altsasuko lantegiaren etorkizuna eta lanpostuak bermatzeko lankidetza eskatu die inplikatutako alde guztiei. Batzordearen ustez, "produktua duen eta merkatua duen enpresa" bat da.
Azarotik hartzekodunen konkurtsoan dago konpainia, eta, abendutik, konkurtso-administraziopean. Aste erabakigarriak dira bideragarritasuna erabakitzeko.
Gaur egun, urtarrilaren 19tik aurrera hiru hilabete gehiagoz luzatuko den aldi baterako enplegu-erregulazioko espedientearen pean daude langileak. Batzordearen arabera, funtsezkoa da aurreikusitako autobusak Altsasun egitea eta epe luzerako lana bermatzea. Horretarako, nabarmendu dute plan industrial sendoa duen inbertitzailea beharrezkoa dela eta sektore publikoak babestu egin behar duela.
Langileek manifestazioa deitu dute Altsasun urtarrilaren 19an eguerdian, Sakanako herritarren, erakundeen eta gizarte eragileen babesa lortzeko. "Egindako ahaleginak guztiontzako enplegua eta etorkizuna ekarri behar ditu", ondorioztatu dute.