Ekonomia -
ITXIERA MAHAI GAINEAN
Labea "modu jakin batean" itzali ezean eraikina kolapsatzeko arriskuaz ohartarazi du Guardianen batzordeak
Astelehen honetan erabakiko dute langileek greba mugagabea hasi edo ez. Goizean zuzendaritzarekin bildu ondoren bi batzar egingo dituzte. Asteartean, Eusko Jaurlaritza enpresaren zuzendaritzarekin bilduko da.
EIDER JAUREGI OIARTZABAL | EITB MEDIA
Laudioko Guardian Glasseko labea "modu jakin batean" itzaltzen ez bada "eraikina kolapsatzeko" arriskua dagoela ohartarazi du enpresa batzordeak. Are gehiago, protokoloari buruzko kezka agertu du langile batzordeak, oraindik enpresak ez duelako protokolorik prestatu eta "segur aski" labea itzali ondoren iritsiko delako.
Guardian Glass multinazionalaren Enpresa Batzordea (ELAk eta LABek osatzen dute) Laudioko enpresaren zuzendaritzarekin bildu da gaur goizean, joan den astean itxiera iragarri ondoren, egoerari buruz hitz egiteko.
Ondoren, Batzordeak bi batzar egingo ditu langileekin: 10:00etan, lehena eta 15:00etan, bigarrena. Langileen ordezkariek hilaren 30etik aurrera greba mugagabea deitzeko aukera planteatuko diete langileei. Gainera, hilaren 29rako lantegiaren sarreran elkarretaratzea deitu dute.
Urtarrilaren 29an, enpresak labea itzaltzea aurreikusten du, eta batzordea beldur da hori egiteak lantegia behin betiko ixteko epeak azkartuko ote dituen.
Hain zuzen ere, Eusko Jaurlaritzak "harridura eta ezinegona" adierazi die igande honetan Guardian Glassen jabeei, publiko egindako ohar batean, labearen itxiera urtarrilaren 29ra aurreratu dutelako. Hasiera batean, labea otsailaren 3an gelditzekoak ziren baina lehenago itzaltzea erabaki zuten iragan ostiralean.
AEBko multinazionalaren zuzendaritzaren arabera, beira egiten duen lantegiko labea kaltetuta dago, eta, ondorioz, fabrika ezin da martxan egon. Hori dela eta, 171 langile dituen lantegia ixtea erabaki dute.
Jaurlaritzak eta Guardianen zuzendaritzak bilera dute asteartean, urtarrilaren 28an, konponbideak aztertzeko, eta Eusko Jaurlaritzak enpresari eskatu dio "ez dezala hartu fabrikaren jardueraren etorkizuna hipotekatu dezakeen erabakirik bilera egin aurretik".
Jaurlaritzak enpresari iradoki dio karga-hormarekin dagoen arazoa beroaldian egindako geldialdi batekin (Hot Hold) konpon daitekeela, edota labea kaltetuko ez dela bermatuko lukeen beste irtenbide teknikoren batekin.
Ildo horretan, "labeari buruzko edozein erabaki tekniko hartu aurretik, bi aldeek adostutako aholkularitza tekniko independente bati labearen egoera ebaluatzea eta irtenbide posibleen analisia egitea" proposatu dio Jaurlaritzak enpresaren zuzendaritzari.
