Ekonomia -
ERREGAIA
Erregai-depositua betetzea 10 euro merkeagoa izango da Aste Santu honetan, petrolioaren beherakada dela eta
Estatu Batuen eta Txinaren arteko gerra komertzialak ustekabeko ondorioak ekarri ditu. Zenbait sektorek tentsio komertziala pairatzen duten arren, erregaiaren prezioa nabarmen jaitsiko da.
EITB MEDIA
Donald Trump AEBko presidenteak hartutako muga-zergek ekarritako tentsio komertzialak albo-ondoriorik ere izan du, ustekabekoa, baina positiboa: petrolioa merkatu egin da. Neurri protekzionistak hasi zirenetik, Brent upela 10 dolar jaitsi da, 65 dolarreko markaraino, azken lau urteetan izan duen mailarik baxuena.
Jaitsiera horrek eragin zuzena izan du erregaien prezioan, berehalakoa izan ez bada ere. Gasolina litroa bost zentimo inguru jaitsi da, 1,49 euroan baitago, eta gasolioa, berriz, 1,40 euroan. Alde hori are nabarmenagoa da iazko Aste Santuko prezioekin alderatuz gero.
Ander Garrido Easy Gas katearen bozeramailearen hitzetan, "jaitsiera pozgarria da poltsikoarentzat, eta itxura guztien arabera, prezioak baxuak izango dira datozen asteetan ere".
Panorama horrekin, gidarien poltsikoek lasaitua hartuko dute: andel ertain bat betetzea 10 euro inguru merkeagoa izango da. Erregaien preziorik baxuena da 2021etik, Aste Santuko joan-etorri jendetsuetarako primerakoa.