Eusko Jaurlaritzak aldatu egingo ditu merkataritza-lokalak etxebizitza bihurtzeko baldintzak

Eusko Jaurlaritzak merkataritza-lokalak etxebizitza bihurtzeko baldintzak aldatuko ditu, 2022tik indarrean dagoen Bizigarritasun Dekretuan jasotako baldintzak aldatuz.

Neurri hori gaur iragarri du Denis Itxaso Etxebizitza eta Hiri Agendako sailburuak, Eusko Legebiltzarreko kontrol saioan, PSE-EEren galdera bati erantzunez.

Itxasok azaldu duenez, Etxebizitza Sailak egindako kalkuluen arabera, etxe bihurtzeko baldintza teknikoak betetzen dituzten 7.500 lonja baino gehiago daude Euskal Autonomia Erkidegoan.

Kalkulu horren abiapuntua da gaur egun erkidegoan dauden 21.295 lokal hutsen % 36k gutxieneko bizigarritasun-baldintzak bete ditzaketela.

Etxebizitza berri horiek Bizigarritasunari buruzko Dekretuaren 10. artikuluak jasotakoa baliatu ahalko dute. Artikulu horrek eskakizun tekniko jakin batzuk betetzetik salbuestea arautzen du, hirigintza-plangintzak aldez aurretik aurreikusi beharrik gabe.

Gainera, orain arteko baldintzak aldatuko dira, eguzki-argia, orientabideak edo banaketa aipatzen dituztenak, baina gutxienez 35 metro karratuko azalera eta gutxienez 2,60 metroko altuera izan beharko dute.

Ekimena interes komertzialeko guneetan kokatuta ez dauden lokaletan aplikatuko da, eta, gainera, hirugarren sektoreko jarduerak (bulegoak edo kontsultak, esaterako) hartzeko aukerarik ez duten lokaletan.

Eusko Jaurlaritzak, udalekin koordinatutako lan baten bidez, protokolo bat sinatuko du laster Eudelekin, udal-hirigintzako araudietan egin beharreko aldaketak aurrera eramateko.

Arau aldaketak premiazko neurriei buruzko dekretu berri baten barruan sartuko dira, eta Saila hori izapidetzen hasi da jada.