Guardiako osasun zentro berriak pediatria kontsulta izango du eta haren azalera oraingoa halako bost izango da

Arabako Guardia udalerriak osasun zentro berria izango du, egungoa halako bost, eta Barbacana inguruan kokatuko da. Orain arte ez bezala, gainera, pediatriako kontsulta izango du; izan ere, toki falta zela eta, zerbitzu hori behar zutenek Lezako Ospitalera joan behar izaten zuten.

Zehazki, eraikin berriak 1.250 metro koadroko azalera izango du, eta lanek 3,8 milioi euroko kostua izango dute. Alberto Martinez Eusko Jaurlaritzako Osasun sailburuak eta Raul Garcia Ezquerro Guardiako alkateak zentro berria eraikiko den gunea bisitatu dute ostegun goizean. 

1.532 biztanle ditu Arabako herri horrek, baina gauza jakina da kopuru hori bikoiztu egiten dela udako hilabeteetan. Hala, osasun zentro berri honekin, modernoagoa, irisgarriagoa, handiagoa eta zerbitzu gehiago izango dituena, herritarren osasun-beharrei erantzun nahi diete.

Osasun sailburuak adierazi duenez, leku egokia da, "irisgarria eta aparkalekuduna", eta konpromisoa hartu du proiektua "lehenbailehen aurrera ateratzeko". Bestalde, Guardiako alkateak esan du "orain, ekipo teknikoen txanda" dela, "lanean hasteko".

Anbulatorio berriak orain artekoa ordezkatuko du, Kartzelako plazan dagoena, alegia. Eraikin zaharrak 275 metro karratuko azalera du, eta txiki samarra da Guardian eta inguruan bizi diren herritarrei arreta emateko.

Eraikin berriak honako zerbitzuak emango ditu: 2 familia-mediku, 3 erizain familia-erizain, pediatriako kontsulta bat, pediatrikoa erizain bat, hortz-higienerako kontsulta bat, odontologiako beste bat, fisioterapia gela bat, eta erabilera anitzeko eta talde-jardueretarako gelak, besteak beste.