Bugaboo etxeko ume-kotxeetako bi modelotan akatsak atzeman dituzte

Bugaboo enpresak akatsak atzeman ditu Cameleon eta Donkey modelotako ume-kotxeetan. Zehazki, ume-kotxeen heldulekuetan dago akatsa, eta, enpresak ohar bidez iragarri duenez, doan aldatuko die pieza hori kaltedunei. Halere, segurtasunari dagokionez, arriskua “txikia” dela jakinarazi dute arduradunek.

Enpresa ume-kotxe horiek dituzten bezeroekin harremanetan jartzen ari da heldulekua aldatzeko. Bugabooren arabera, heldulekuko botoi zuria bere tokitik atera daiteke haurraren kapazua edo jarlekua lurrean edo gainazal ezegonkor baten gainean dagoenean.

Botoi zuria bere tokitik ateraz gero, heldulekua albo batera eror liteke, Bugabook jakinarazi duenez. Hala ere, erabiltzaileek ez dute halakorik salatu.

Bi modelo horiek segurtasun neurriak betetzen badituzte ere, enpresak heldulekuaren diseinua aldatzea erabaki du. Arduradunen arabera, dagoeneko prest dute Cameleon modelorako helduleku berria, eta otsail amaierarako edo martxo hasierarako prest izango dute Donkey modelorako heldulekua.